وبلىس اكىمىنىڭ حالىقارالىق ماڭىزى بار جولداردىڭ بويىن رەتكە كەلتىرۋ بويىنشا تاپسىرماسىنا سايكەس، تۇركىستان-شىمكەنت-سارىاعاش باعىتىنداعى كۇرەجول بويىندا ورنالاسقان كاسىپكەرلىك نىساندارعا جۇرگىزىلگەن زەردەلەۋ ناتيجەسى بۇگىن وبلىس اكىمىنىڭ ورىنباسارى نۇربول تۇراشبەكوۆتىڭ توراعالىعىمەن وتكەن جينالىستا سارالاندى، دەپ حابارلايدى Dalanews.kz
«جۇمىسشى توپ بۇگىنگى تاڭدا 137 نىساندى ارالاپ، ءبىرقاتار كاسىپكەرگە عيماراتتاردىڭ ساۋلەتىنە قاتىستى ەسكەرتۋ جاسادى. تۇركىستان-شىمكەنت-سارىاعاش باعىتىندا 33 جانارماي بەكەتى، 69 تاماقتانۋ ورنى، 8 ءقوناقۇي، كولىككە تەحنيكالىق قىزمەت كورسەتەتىن 27 نىسان بار. 7 نىساننىڭ يەلەرى جوندەۋ جۇمىستارىن جۇرگىزۋگە ۋاقىت سۇراسا، يەسى انىقتالماعان 3 عيماراتتى بۇزۋ جونىندە مەكەن جايى بويىنشا اۋدان اكىمدىكتەرىنە ۇسىنىس جولداندى. ورداباسى جانە بايدىبەك اۋداندارىندا ورنالاسقان 4 نىساننىڭ يەسى ناقتىلانۋدا»، — دەلىنگەن تۇركىستان وبلىسىنىڭ باسپا ءسوز قىزمەتىنىڭ حابارلاماسىندا.
ءبىرقاتار نىساندار الماتى-تەرمەز تاس جولى جوندەۋدەن وتكەن 2010 جىلدان بەرى قىزمەتىن توقتاتقان. ويتكەنى عيماراتتار جول قورشاۋىنىڭ تىسىندا قالىپ قويعان. كاسىپكەرلەر عيماراتقا كولىك بۇرىلىسىنا جول اشىلىپ، رۇقسات بەرىلگەن جاعدايدا جوندەۋ جۇمىستارىن جۇرگىزىپ، جۇمىس ىستەۋگە نيەتتى ەكەندەرىن جەتكىزگەن.
وبلىس اكىمىنىڭ ورىنباسارى دۇڭگىرشەكتەر مەن ساۋدا قاتارلارى ءۇشىن ءبىرىڭعاي ساۋلەت ۇلگىسىن ۇسىنۋدى تاپسىردى. سونىمەن قاتار، جولاۋشىلاردىڭ قاجەتتىلىكتەرىن ەسكەرە وتىرىپ، جول بويىندا كورسەتىلەتىن قىزمەت تۇرلەرىنىڭ تىزبەسىن جۇمىسىن قايتا باستايتىن كاسىپكەرلەرگە ۇسىنۋ كەرەكتىگىن اتاپ ءوتتى. سونىمەن قاتار، وبلىستاعى اۋدان-قالا ارالىق جول جيەكتەرىندەگى كاسىپكەرلىك نىسانداردىڭ زاڭدىلىعىن زەردەلەپ، قاسبەتتەرىن رەتتەۋ بويىنشا ءتيىستى تاپسىرمالار بەردى.
