Túrkistan oblysynda óndiris oryndaryn ashý, investitsiia tartýǵa basymdyq berilgen. Aimaqta «Shaǵyn ónerkásiptik park» jobasy óte sátti júzege asyp keledi. Oblys ákimi Nuralhan Kósherov Saýran aýdanyndaǵy atalǵan óndiristik parkti aralap, júzege asyrylǵan jáne endi iske qosylatyn jobalarmen tanysty,- dep habarlaidy Dalanews.kz
– Bizdiń basym baǵytymyz – óndiris oryndaryn ashý. Odan basqa jol joq. Óndiristik parktegi árbir ǵimaratta óndiris oryndary jedel iske qosylyp, jumys oryndary ashylýy tiis. Al ǵimaratty alyp, jobany keshiktirgendermen jumys júrgizińizder. Nysandy basqa investorlar men kásipkerlerge usyný qajet. Jumystar jospardan keshikpeýi kerek, – dedi Nuralhan Kósherov.
Oblys ákimi «AVATAR AGRICULTIRAL TECHNOLOGY DEVELOPMENT» kompaniiasynyń óndiris ornynda boldy. Bul kompaniiamen jyl basynda aýyl sharýashylyǵy drondaryn shyǵaratyn zaýyt ashý boiynsha kelisim jasalǵan bolatyn. Jobanyń boljamdyq quny – 5 mln. AQSh dollary. Qýattylyǵy aiyna – 600 dana. Búginde qytailyq investor ǵimaratty óndiriske beiimdep, arnaiy qural-jabdyqtaryn jetkize bastady. Jumystyń basym bóligin negizinen robottar atqarady dep kútilýde. Óńir basshysy investormen pikir almasyp, jobaǵa qoldaý kórsetiletinin jetkizdi. Atalǵan zaýyt ashylǵan soń elimizdi aýyl sharýashylyǵy drondarymen qamtýdy kózdep otyr.
Óńir basshysy aýyl sharýashylyǵy tehnikalaryn, turmysqa qajetti paket shyǵaratyn, jihaz óndiretin jáne ózge de kásiporyndardy aralap kórdi. Jylý qazandyqtaryn qurastyrý jospary da pysyqtaldy. Kásipkerler men investorlar jumysty bastaýǵa qolaily jaǵdai usynǵan oblys ákimdigine rizashylyqtaryn bildirdi. Aldaǵy ýaqytta óndiristik park jańa jobalarmen tolyǵady dep josparlanyp otyr.
