تۇركىستان وبلىسىندا ءوندىرىس ورىندارىن اشۋ، ينۆەستيسيا تارتۋعا باسىمدىق بەرىلگەن. ايماقتا «شاعىن ونەركاسىپتىك پارك» جوباسى وتە ءساتتى جۇزەگە اسىپ كەلەدى. وبلىس اكىمى نۇرالحان كوشەروۆ ساۋران اۋدانىنداعى اتالعان وندىرىستىك پاركتى ارالاپ، جۇزەگە اسىرىلعان جانە ەندى ىسكە قوسىلاتىن جوبالارمەن تانىستى،- دەپ حابارلايدى Dalanews.kz
– ءبىزدىڭ باسىم باعىتىمىز – ءوندىرىس ورىندارىن اشۋ. ودان باسقا جول جوق. وندىرىستىك پاركتەگى ءاربىر عيماراتتا ءوندىرىس ورىندارى جەدەل ىسكە قوسىلىپ، جۇمىس ورىندارى اشىلۋى ءتيىس. ال عيماراتتى الىپ، جوبانى كەشىكتىرگەندەرمەن جۇمىس جۇرگىزىڭىزدەر. نىساندى باسقا ينۆەستورلار مەن كاسىپكەرلەرگە ۇسىنۋ قاجەت. جۇمىستار جوسپاردان كەشىكپەۋى كەرەك، – دەدى نۇرالحان كوشەروۆ.
وبلىس اكىمى «AVATAR AGRICULTIRAL TECHNOLOGY DEVELOPMENT» كومپانياسىنىڭ ءوندىرىس ورنىندا بولدى. بۇل كومپانيامەن جىل باسىندا اۋىل شارۋاشىلىعى دروندارىن شىعاراتىن زاۋىت اشۋ بويىنشا كەلىسىم جاسالعان بولاتىن. جوبانىڭ بولجامدىق قۇنى – 5 ملن. اقش دوللارى. قۋاتتىلىعى ايىنا – 600 دانا. بۇگىندە قىتايلىق ينۆەستور عيماراتتى وندىرىسكە بەيىمدەپ، ارنايى قۇرال-جابدىقتارىن جەتكىزە باستادى. جۇمىستىڭ باسىم بولىگىن نەگىزىنەن روبوتتار اتقارادى دەپ كۇتىلۋدە. ءوڭىر باسشىسى ينۆەستورمەن پىكىر الماسىپ، جوباعا قولداۋ كورسەتىلەتىنىن جەتكىزدى. اتالعان زاۋىت اشىلعان سوڭ ەلىمىزدى اۋىل شارۋاشىلىعى دروندارىمەن قامتۋدى كوزدەپ وتىر.
ءوڭىر باسشىسى اۋىل شارۋاشىلىعى تەحنيكالارىن، تۇرمىسقا قاجەتتى پاكەت شىعاراتىن، جيھاز وندىرەتىن جانە وزگە دە كاسىپورىنداردى ارالاپ كوردى. جىلۋ قازاندىقتارىن قۇراستىرۋ جوسپارى دا پىسىقتالدى. كاسىپكەرلەر مەن ينۆەستورلار جۇمىستى باستاۋعا قولايلى جاعداي ۇسىنعان وبلىس اكىمدىگىنە ريزاشىلىقتارىن ءبىلدىردى. الداعى ۋاقىتتا وندىرىستىك پارك جاڭا جوبالارمەن تولىعادى دەپ جوسپارلانىپ وتىر.
