Túrkistan oblysynda jalpy aýmaǵy 2397,3 gektardy quraityn 20 indýstrialdy aimaq qurylǵan. Qazirgi ýaqytta jalpy quny 39,5 mlrd. teńgege 50 investitsiialyq joba iske qosylyp, nátijesinde 2 609 jumys orny ashyldy. Sondai-aq aldaǵy ýaqytta jalpy quny 112,4 mlrd. teńgege 48 investitsiialyq jobany iske asyryp, 3 812 jańa jumys ornyn ashý josparlanǵan. Atalǵan investitsiialyq jobalar qurylys materialdardy jáne daiyn metall ónimderin óndirý, metallýrgiia, mashina jasaý, plastmassadan jasalǵan ónimderdi óndirý, jeńil jáne jihaz ónerkásibi salalarynda júzege asyrylýda. Bul týraly Túrkistan oblysynyń ákimi Nuralhan Kósherovtiń tóraǵalyǵymen ótken apparattyń aptalyq májilisinde málimdeldi, dep habarlaidy Dalanews.kz.
Oblys basshysy investitsiialyq ahýaldy odan ári jaqsartý, investorlarǵa jan-jaqty qoldaý kórsetý boiynsha naqty tapsyrmalar berdi.
– Prezident halyqqa arnalǵan biylǵy Joldaýynda investitsiia tartý, kásipkerlikti qoldaý jáne óńdeý ónerkásibin damytý máselelerine airyqsha mán berdi. Sondyqtan indýstrialdy aimaqtarda óńdeý ónerkásibin damytýǵa baǵyttalǵan jobalarǵa basymdyq bere otyryp jumys júrgizý qajet. Indýstrialdy aimaqtar infraqurylym júielerimen tolyq qamtylýy tiis. Shuǵyl túrde máselelerdi sheshýdiń qadamdyq is-sharalar josparyn jasap, atqarylǵan jumystar týraly ár apta saiyn málimet usynyp otyrýdy tapsyramyn. Investitsiia tartý, indýstrialdy aimaqtarǵa qatysty jumystardy sapaly oryndamaǵan basshylardyń jaýapkershiligi qaralady, – dedi Nuralhan Kósherov.
Oblystyq ónerkásip jáne indýstrialdy-innovatsiialyq damý basqarmasy basshysynyń mindetin atqarýshy Qanat Shonbasovtyń aitýynsha, indýstrialdy aimaqtardyń infraqurylymyn júrgizý úshin 12,35 mlrd. teńge qarjy jumsalǵan. Biýdjetten jumsalǵan 1 teńgege 12,3 teńge jeke investitsiia tartyldy.
Osy jyldyń I jartyjyldyǵynda kásiporyndardyń óndirilgen ónim kólemi 12,5 mlrd. teńgeni qurady. Biýdjetke 756,6 mln. teńge salyq túsken. Búginde indýstrialdy aimaqtarǵa jalpy quny 78,1 mlrd. teńgege jańa 28 investitsiialyq joba ornalastyryldy. Nátijesinde, 2370 jumys orny ashyldy.
Atalǵan investitsiialyq jobalar qurylys materialdaryn jáne daiyn metall ónimderdi óndirý, metallýrgiia, mashina jasaý, plastmasadan jasalǵan ónimderdi óndirý, jeńil jáne jihaz ónerkásibi salalarynda júzege asyrylýda.
Májiliste aýdan, qalalardaǵy indýstrialdy aimaqtardyń jaǵdaiy, onda júzege asyrylyp jatqan jobalar baiandaldy. Aýdan, qala ákimderi men jaýapty basqarma basshysyna indýstrialdy aimaqtarynyń infraqurylym júielerin júrgizýge qajetti qarjynyń esebin jasaý, jerdi alyp, jumysyn bastamaǵan kásipkerlerden jerdi qaitarý, zaýyttardy jergilikti salyqtyq organdarǵa tirkeý jáne ózge jobalardy kóbeitý jóninde tapsyrma berildi.
