Almatyda bloger ári zańger Ádilethan Moldahanǵa qatysty sot protsesi jalǵasyp jatyr, dep habarlaidy dalanews.kz.
Búgin Almaty qalasynyń Almaly aýdandyq sotynda qylmystyq is boiynsha kezekti sot otyrysy ótti. Sot barysynda prokýror aiyptaý aktisin jariialaǵan. Sondai-aq, jábirlenýshilerdiń biri - Almaty qalasy Politsiia basqarmasynyń burynǵy basshysy Shýmaevtan jaýap alynǵan.
Is boiynsha Almaty qalalyq Politsiia departamenti basshysynyń orynbasary Uzabaevtyń múddesin advokat Asylbek Ábdiraiymov qorǵap jatyr.
Advokattyń aitýynsha, taraptar arasynda tatýlasý kelisimine qol jetkizilmegen jáne keltirilgen shyǵyn ótelmegen.
Osyǵan bailanysty sotqa 10 million teńge kóleminde moraldyq shyǵyn óndirý jáne zańgerlik kómekke jumsalǵan 1 million teńge shyǵyndy óteý týraly azamattyq talap-aryz berilgen.
Aita keteiik, bul is Qazaqstan Respýblikasy Qylmystyq kodeksiniń 274-baby 2-bóligi 3-tarmaǵy boiynsha qaralyp jatyr. Advokattyń pikirinshe, bul jaǵdai jekelegen laýazymdy tulǵalardyń bedeline ǵana emes, memlekettik organdar men quqyq qorǵaý júiesine degen qoǵamdyq senimge de áser etedi.
Sot talqylaýy jalǵasyp jatyr.
