Pavlodarda esirtki saýdasy men qylmystyq tabysty zańdastyrý isi boiynsha sot úkimi shyqty, dep habarlaidy dalanews.kz.
Qarjylyq monitoring agenttiginiń oblystyq departamenti júrgizgen tergeý barysynda kúdikti quramynda esirtki bar kóknár tuqymyn azyq-túlik ónimi retinde satyp kelgeni anyqtalǵan.
Tergeý málimetine súiensek, bul iske onyń jaqyn týystary da qatysqan. Olar ónimdi jetkizý, saqtaý, býyp-túiý jáne ótkizý jumystaryn ózara bólisken. Taýarlar basqa óńirlerden logistikalyq kompaniialar arqyly jetkizilip, kóknár tuqymy men dámdeýish retinde satylǵan.
Tintý kezinde esirtki qosylǵan kóknár tuqymy tárkilendi. Tólemder qolma-qol aqsha jáne bank aýdarymdary arqyly qabyldanǵan. Zańsyz tabysqa uiymdastyrýshy eki kólik satyp alyp, olardy úshinshi tulǵalardyń atyna rásimdegen.
Sot sheshimimen uiymdastyrýshy men onyń eki sybailasy 7 jylǵa bas bostandyǵynan aiyryldy. Sonymen qatar, kólikter memleket menshigine ótti. Quramynda esirtki bar 321 keli kóknár tuqymy joiyldy. Úkim zańdy kúshine endi.
