«Qazaqstan temir joly» ulttyq kompaniiasynyń basqarma tóraǵasy Talǵat Aldybergenov otbasy músheleriniń temirjol jáne logistika salasyndaǵy biznesine qatysty suraqqa jaýap berip, múddeler qaqtyǵysy joq ekenin málimdedi, dep habarlaidy dalanews.kz.
Úkimettegi brifing barysynda jýrnalister QTJ basshysynyń jubaiyna tiesili birqatar tabysty kompaniialar, sondai-aq onyń týystarynyń temirjol jáne logistika salasyndaǵy qyzmeti týraly suraq kóterdi. Sonymen qatar deklaratsiialarda kórsetilgen kirister men yqtimal múddeler qaqtyǵysy máselesi de sóz boldy.
"Adal Adam" tilshisiniń aitýynsha, ashyq derekkózderde Aldybergenovtiń jubaiy Elmira Qolǵanatova birneshe logistikalyq kompaniiaǵa ielik etetini, al uly men basqa da týystarynyń temirjol salasymen bailanysty bolǵany kórsetilgen.
Buǵan jaýap bergen QTJ basshysy jubaiyna qatysty kompaniialardyń ulttyq kompaniiamen nemese memlekettik organdarmen jumys istemeitinin aitty.
«Birinshiden, jubaiym qatysy bar kompaniialar QTJ-men de, memlekettik organdarmen de jumys istemeidi. Ekinshiden, negizgi qyzmetim boiynsha eshqandai múddeler qaqtyǵysy joq. Barlyǵy zań talaptaryna sáikes deklaratsiialanǵan», – dedi Aldybergenov.
Jýrnalist onyń otbasy músheleriniń tabysy men aktivteri tolyq kólemde deklaratsiiada kórsetilgen-kórsetilmegenin naqtylaǵan kezde QTJ basshysy barlyq málimet zań aiasynda jariialanǵanyn aitty.
«Deklaratsiia zańǵa sáikes jariialanady. Qarap shyǵýǵa bolady», – dedi ol.
Sonymen qatar jýrnalist týystarynyń temirjol logistikasy salasyndaǵy qyzmeti men QTJ basshylyǵy arasynda múddeler qaqtyǵysy bolýy múmkin ekenin alǵa tartty. Alaida Aldybergenov bul pikirmen kelispeitinin jetkizdi.
«Meniń týystarym QTJ-da jumys istemeidi. Balalarym da, jubaiym da ulttyq kompaniiada qyzmet atqarmaidy. Sondyqtan munda eshqandai múddeler qaqtyǵysyn kórip turǵan joqpyn», – dedi QTJ tóraǵasy.
