Túrkistan oblysynda tótenshe jaǵdaı kezinde komýnaldyq qyzmet úshin beriletin 15 myń teńge tólemge aldyn ala esep boıynsha 385 380 adam qol jetkizetin bolady. Oǵan respýblıkalyq búdjetten 11,5 mlrd teńge bólinip otyr. Azamattardan ótinimder 1 mamyrdan bastap arnaıy elektrondy júıe arqyly jáne "109" call-ortalyǵymen qabyldanatyn bolady. Búgin bul týraly Óńirlik komýnıkasıalar qyzmetinde oblystyq Energetıka jáne turǵyn-úı sharýashylyq basqarma basshysynyń orynbasary Baqytjan Polatbekov málimdedi.

Onyń aıtýynsha, komýnaldyq qyzmetter boıynsha shyǵyndardy óteýge arnalǵan memlekettik kómekti tek sanat boıynsha ala alatyn adamnyń jeke komýnaldyq tólem jasaıtyn derbes shoty bolýy tıis.

«Mınıstrlik bekitken tizbege sáıkes, járdemaqyny alýǵa quqyǵy bar adamdar: 1)1-2-3 toptaǵy múgedekter; 2) Uly Otan soǵysynyń múgedekteri men qatysýshylary jáne qatysýshylaryna teńestirilgen adamdar; 3) múgedek balalardy tárbıeleýshi otbasylar; 4)kópbalaly otbasylar; 5)eń tómen jáne az zeınetaqy alatyn zeınetkerler; 6) memlekettik nemese qoǵamdyq mindetterin, áskerı qyzmetin oryndaý kezinde, sondaı-aq ǵarysh keńistigine ushýdy daıyndaý nemese júzege asyrý ne adam ómirin qutqarý kezinde, quqyq tártibin qorǵaý jaǵdaıynda qaza tapqan adamdardyń otbasylary; 7) ataýly áleýmettik kómek alatyn azamattar, onyń ishinde jalǵyz basty zeınetkerler», - dedi Baqytjan Ánýarbekuly.

Aıta keterligi, 15 myń teńge tólemdi alýǵa ótinim berý úshin qazirgi tańda arnaıy elektrondy júıe daıyndalýda. Ol júıe aǵymdaǵy jyldyń 1 mamyryna deıin iske qosylatyn bolady. Tólemdi alý úshin tutynýshy aqparattyq júıeler nemese call-ortalyq arqyly jeke sáıkestindirý nómirin, áleýmettik dárejesin jáne derbes shot derekterin kórsete otyryp, ákimdikke ótinim berýi kerek. Oblys boıynsha «109» call-ortalyq baılanys telefony iske qosylǵan. Sall-ortalyqqa ótinim berý 1 mamyrda bastalady.

Ákimdikke aqparattyq júıe nemese call-ortalyq arqyly ótinim túsken soń, tutynýshynyń derekterin tekseredi, málimetter ras bolǵan jaǵdaıda, ýákiletti mekemelerge atalǵan tizbedegi sanat boıynsha anyqtaý úshin joldanady. Keıin ýákiletti mekeme rastaǵan soń, komýnaldyq qyzmet kórsetýshi mekemelerge elektrondy túrde jiberiledi. Ýákiletti mekeme tutynýshynyń jeke esep shot derekterine sáıkes ekenin belgileıdi. Rastalǵan jaǵdaıda, ákimdik bes jumys kúninen keshiktirmeı tutynýshynyń jeke shotyna qarjy jóneltetin bolady. Joǵarydaǵy atalǵan sanattarǵa jatatyn tutynýshylarǵa ár aı 15 myń teńgeden 2 aı (sáýir, mamyr) merzimi úshin tólem júrgiziletin bolady. Sonymen qatar, atalǵan kómekti alýǵa ótinim bildirý mamyr-maýsym aılary aralyǵynda qabyldanatyn bolady.

Túrkistan oblysynyń Óńirlik komýnıkasıalar qyzmeti