QMA Túrkistan oblysy boiynsha departamenti azamattardyń ómiri men densaýlyǵyna qaýip tóndiretin temeki ónimderin (sniýs) zańsyz daiyndap, taratýmen ainalysqan toptyń qyzmetin toqtatty, dep habarlaidy Dalanews.kz.
Jedel-izdestirý is-sharalary barysynda Keles jáne Ordabasy aýdandary aýmaǵynda ornalasqan 3 jasyryn tsehtyń jumysy áshkerelenip, tolyqtai joiyldy.
Zańsyz óndiris jalpy aýdany 500 sharshy metrden asatyn nysandarda uiymdastyrylyp, kún saiyn shamamen 20 adam jumysqa tartylǵan.
Tyiym salynǵan ónimder elimizdiń barlyq óńirlerine júieli túrde taratylyp otyrǵan.
Zańsyz ainalymnan 1 mln-nan astam daiyn ónim, 30 tonna temeki, 2 mln qaptama paketi, túrli hosh iistendirgishter men ýly himiialyq qospalar, sondai-aq óndiristik arnaiy jabdyqtar tárkilendi.
Tárkilengen shikizat kólemi shamamen 60 mln dana bir rettik sniýs mólsherin óndirýge jetkilikti bolǵan.
Sot sanktsiiasymen zańsyz qyzmetten túsken qarajatqa satyp alynǵan eki avtokólikke tyiym salyndy.
