قما تۇركىستان وبلىسى بويىنشا دەپارتامەنتى ازاماتتاردىڭ ءومىرى مەن دەنساۋلىعىنا ءقاۋىپ توندىرەتىن تەمەكى ونىمدەرىن (سنيۋس) زاڭسىز دايىنداپ، تاراتۋمەن اينالىسقان توپتىڭ قىزمەتىن توقتاتتى، دەپ حابارلايدى Dalanews.kz.

جەدەل-ىزدەستىرۋ ءىس-شارالارى بارىسىندا كەلەس جانە ورداباسى اۋداندارى اۋماعىندا ورنالاسقان 3 جاسىرىن سەحتىڭ جۇمىسى اشكەرەلەنىپ، تولىقتاي جويىلدى.

زاڭسىز ءوندىرىس جالپى اۋدانى 500 شارشى مەتردەن اساتىن نىسانداردا ۇيىمداستىرىلىپ، كۇن سايىن شامامەن 20 ادام جۇمىسقا تارتىلعان.

تىيىم سالىنعان ونىمدەر ەلىمىزدىڭ بارلىق وڭىرلەرىنە جۇيەلى تۇردە تاراتىلىپ وتىرعان.

زاڭسىز اينالىمنان 1 ملن-نان استام دايىن ءونىم، 30 توننا تەمەكى، 2 ملن قاپتاما پاكەتى، ءتۇرلى حوش يىستەندىرگىشتەر مەن ۋلى حيميالىق قوسپالار، سونداي-اق وندىرىستىك ارنايى جابدىقتار تاركىلەندى.

تاركىلەنگەن شيكىزات كولەمى شامامەن 60 ملن دانا ءبىر رەتتىك سنيۋس مولشەرىن وندىرۋگە جەتكىلىكتى بولعان.

سوت سانكسياسىمەن زاڭسىز قىزمەتتەن تۇسكەن قاراجاتقا ساتىپ الىنعان ەكى اۆتوكولىككە تىيىم سالىندى.