Májilis depýtaty Rinat Zaiytov Túrkistan qalasyna erekshe mártebe berý máselesine qatysty zań jobasyndaǵy birqatar normaǵa syn aitty, dep habarlaidy Dalanews.kz.
Depýtat Túrkistan oblysy ákimdigine qarata zań jobasyndaǵy birneshe termindi túsinbegenin alǵa tartty.
“Qujatta Túrkistannyń óz eltańbasy bolady dep jazylǵan. Menińshe, eltańba Qazaqstanda bireý-aq. Álde Túrkistan jeke memleketke ainalmaq pa? Bul máseleni túsindirýlerińizdi suraimyn. Sondai-aq qujatta “eskertkishterge ozyńqy kútim jasaý” degen uǵym bar. Bul ne degen sóz? “Tarihi-mádeni jáne rýhani nysandardyń kieliligin saqtaý” degendi qalai túsinemiz? Kie degen Qudaidan beriletin qasiet emes pe edi?” – dedi depýtat.
Al Ulttyq ekonomika ministri, Premer-ministrdiń orynbasary Nurlan Baibazarov zańda “eltańba” uǵymy joq ekenin, onyń ornyna “nyshan” sóziniń qoldanylǵanyn atap ótti.
“Túrkistanǵa eltańba emes, qalanyń emblemasy, iaǵni nyshany berilmek. “Kielilikti saqtaý” uǵymy Túrkistannyń rýhani mańyzdylyǵyn kórsetý úshin engizilgen. Bul qala elimizdiń rýhani ómirinde erekshe oryn alady. Eger keibir sózderdi aýystyrý qajet bolsa, biz ekinshi oqylymǵa deiin ózgertýge daiynbyz”, – dedi Baibazarov.
Ministr sondai-aq qazaqsha terminderdi Til komitetimen birlesip sinonimdermen almastyrýǵa bolatynyn aitty.
Aita keteiik, buǵan deiin májilis depýtaty Ardaq Nazarov Túrkistanda araq satpaý týraly usynys jasaǵan bolatyn.
Depýtat Túrkistan qalasy ákimdigine saýal joldady.
"Osy zań aiasynda Túrkistan - rýhani astanamyz, Túrkistan - araqsyz qala dep Túrkistanda araq ishýge, satýǵa, araq iship, láilip kóshede júrýge tyiym salsaq?! Óitkeni rýhani astana dep otyrmyz, búkil qazaq osy jerden rýh alýy kerek. Ol jerde babalarymyz, áýlie, batyr, bilerimiz jatyr. Erteń shetelden kóp qonaq keledi. Sol kezde azamattarymyz araq iship, aldynan shyǵatyn bolsa, uiat qoi. Osy zańnyń aiasynda araqsyz qala, rýhani qala dep araqqa tyiym salýǵa bola ma?" - dedi Nazarov.
Túrkistan oblysy ákiminiń orynbasary Beisenbai Tájibaev depýtattyń saýalyna jaýap berdi.
"Túrkistan oblysynda ishimdiksiz aýyl degen arnaiy joba jariialanǵan. Osy jobaǵa bizdiń oblys boiynsha otyzdan asa aýyl qosylyp otyr. Bul bastama boiynsha Túrkistan qalasynda da jergilikti ziialy qaýymmen, aqsaqaldarmen, qoǵamnyń túrli belsendi ókilderimen arnaiy talqylaýlar ótkizilgen. Túrkistan negizgi basymdyq baǵytynda rýhani-mádeni baǵytpen qatar, týristik baǵyttaǵy qala retinde de bekitilip otyr. Soǵan sáikes biznes qaýymdastyqtyń ókilderi tarapynan osy máselege túrli kózqaras týyndady. Bul másele oryndy. Aldaǵy ýaqytta zań normalary aiasynda qarastyrý qajet dep sanaimyz", - dedi ol.
Eske salaiyq, kelesi jyly Túrkistan qalasyna erekshe mártebe beriledi. Búgin Májilis depýtattary Túrkistan qalasyna erekshe mártebe berý týraly zań jobasyn aiaqtap, birinshi oqylymǵa usynýǵa daiyn.
Bul qujat Túrkistandy Qazaqstannyń rýhani-mádeni, tarihi jáne týristik ortalyǵy retinde damytýǵa baǵyttalǵan.
