ءماجىلىس دەپۋتاتى رينات زايىتوۆ تۇركىستان قالاسىنا ەرەكشە مارتەبە بەرۋ ماسەلەسىنە قاتىستى زاڭ جوباسىنداعى ءبىرقاتار نورماعا سىن ايتتى، دەپ حابارلايدى Dalanews.kz.
دەپۋتات تۇركىستان وبلىسى اكىمدىگىنە قاراتا زاڭ جوباسىنداعى بىرنەشە تەرميندى تۇسىنبەگەنىن العا تارتتى.
“قۇجاتتا تۇركىستاننىڭ ءوز ەلتاڭباسى بولادى دەپ جازىلعان. مەنىڭشە، ەلتاڭبا قازاقستاندا بىرەۋ-اق. الدە تۇركىستان جەكە مەملەكەتكە اينالماق پا؟ بۇل ماسەلەنى تۇسىندىرۋلەرىڭىزدى سۇرايمىن. سونداي-اق قۇجاتتا “ەسكەرتكىشتەرگە وزىڭقى كۇتىم جاساۋ” دەگەن ۇعىم بار. بۇل نە دەگەن ءسوز؟ “تاريحي-مادەني جانە رۋحاني نىسانداردىڭ كيەلىلىگىن ساقتاۋ” دەگەندى قالاي تۇسىنەمىز؟ كيە دەگەن قۇدايدان بەرىلەتىن قاسيەت ەمەس پە ەدى؟” – دەدى دەپۋتات.
ال ۇلتتىق ەكونوميكا ءمينيسترى، پرەمەر-مينيستردىڭ ورىنباسارى نۇرلان بايبازاروۆ زاڭدا “ەلتاڭبا” ۇعىمى جوق ەكەنىن، ونىڭ ورنىنا “نىشان” ءسوزىنىڭ قولدانىلعانىن اتاپ ءوتتى.
“تۇركىستانعا ەلتاڭبا ەمەس، قالانىڭ ەمبلەماسى، ياعني نىشانى بەرىلمەك. “كيەلىلىكتى ساقتاۋ” ۇعىمى تۇركىستاننىڭ رۋحاني ماڭىزدىلىعىن كورسەتۋ ءۇشىن ەنگىزىلگەن. بۇل قالا ەلىمىزدىڭ رۋحاني ومىرىندە ەرەكشە ورىن الادى. ەگەر كەيبىر سوزدەردى اۋىستىرۋ قاجەت بولسا، ءبىز ەكىنشى وقىلىمعا دەيىن وزگەرتۋگە دايىنبىز”، – دەدى بايبازاروۆ.
مينيستر سونداي-اق قازاقشا تەرميندەردى ءتىل كوميتەتىمەن بىرلەسىپ سينونيمدەرمەن الماستىرۋعا بولاتىنىن ايتتى.
ايتا كەتەيىك، بۇعان دەيىن مءاجىلىس دەپۋتاتى ارداق نازاروۆ تۇركىستاندا اراق ساتپاۋ تۋرالى ۇسىنىس جاساعان بولاتىن.
دەپۋتات تۇركىستان قالاسى اكىمدىگىنە ساۋال جولدادى.
"وسى زاڭ اياسىندا تۇركىستان - رۋحاني استانامىز، تۇركىستان - اراقسىز قالا دەپ تۇركىستاندا اراق ىشۋگە، ساتۋعا، اراق ءىشىپ، ءلايلىپ كوشەدە جۇرۋگە تىيىم سالساق؟! ويتكەنى رۋحاني استانا دەپ وتىرمىز، بۇكىل قازاق وسى جەردەن رۋح الۋى كەرەك. ول جەردە بابالارىمىز، اۋليە، باتىر، بيلەرىمىز جاتىر. ەرتەڭ شەتەلدەن كوپ قوناق كەلەدى. سول كەزدە ازاماتتارىمىز اراق ءىشىپ، الدىنان شىعاتىن بولسا، ۇيات قوي. وسى زاڭنىڭ اياسىندا اراقسىز قالا، رۋحاني قالا دەپ اراققا تىيىم سالۋعا بولا ما؟" - دەدى نازاروۆ.
تۇركىستان وبلىسى اكىمىنىڭ ورىنباسارى بەيسەنباي تاجىبايەۆ دەپۋتاتتىڭ ساۋالىنا جاۋاپ بەردى.
"تۇركىستان وبلىسىندا ىشىمدىكسىز اۋىل دەگەن ارنايى جوبا جاريالانعان. وسى جوباعا ءبىزدىڭ وبلىس بويىنشا وتىزدان اسا اۋىل قوسىلىپ وتىر. بۇل باستاما بويىنشا تۇركىستان قالاسىندا دا جەرگىلىكتى زيالى قاۋىممەن، اقساقالدارمەن، قوعامنىڭ ءتۇرلى بەلسەندى وكىلدەرىمەن ارنايى تالقىلاۋلار وتكىزىلگەن. تۇركىستان نەگىزگى باسىمدىق باعىتىندا رۋحاني-مادەني باعىتپەن قاتار، تۋريستىك باعىتتاعى قالا رەتىندە دە بەكىتىلىپ وتىر. سوعان سايكەس بيزنەس قاۋىمداستىقتىڭ وكىلدەرى تاراپىنان وسى ماسەلەگە ءتۇرلى كوزقاراس تۋىندادى. بۇل ماسەلە ورىندى. الداعى ۋاقىتتا زاڭ نورمالارى اياسىندا قاراستىرۋ قاجەت دەپ سانايمىز"، - دەدى ول.
ەسكە سالايىق، كەلەسى جىلى تۇركىستان قالاسىنا ەرەكشە مارتەبە بەرىلەدى. بۇگىن ءماجىلىس دەپۋتاتتارى تۇركىستان قالاسىنا ەرەكشە مارتەبە بەرۋ تۋرالى زاڭ جوباسىن اياقتاپ، ءبىرىنشى وقىلىمعا ۇسىنۋعا دايىن.
بۇل قۇجات تۇركىستاندى قازاقستاننىڭ رۋحاني-مادەني، تاريحي جانە تۋريستىك ورتالىعى رەتىندە دامىتۋعا باعىتتالعان.
