Parlament Senatynyń Spikeri Máýlen Áshimbaevtyń tóraǵalyǵymen Palata otyrysy ótti. Onda senatorlar Túrkistan qalasynyń erekshe mártebesine qatysty zańdardy qarady jáne ózderiniń depýtattyq saýaldaryn joldady, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Senattaǵy otyrys barysynda senatorlar «Túrkistan qalasynyń erekshe mártebesi týraly» zańdy jáne oǵan ilespe «Qazaqstan Respýblikasynyń keibir zańnamalyq aktilerine Túrkistan qalasynyń erekshe mártebesi jáne shet eldegi mádeniet ortalyqtary máseleleri boiynsha ózgerister men tolyqtyrýlar engizý týraly» zańdy qarady.
Atalǵan zańdardyń normalary Túrkistandy Qazaqstannyń rýhani-mádeni, tarihi jáne týristik ortalyǵy retinde damytý úshin quqyqtyq jaǵdailar jasaýǵa, sondai-aq, tarihi-mádeni murany qorǵap, rýhani nysandardyń biregeiligin saqtaýǵa baǵyttalǵan.
– Memleket basshysy Qasym-Jomart Kemeluly Toqaev túrki áleminiń altyn besigi – Túrkistan qalasyna erekshe mártebe berý týraly máseleni oblys jurtshylyǵymen kezdesýinde kótergen bolatyn. Prezidentimizdiń tapsyrmasyn oryndaý úshin arnaiy zań ázirlenip, maquldandy. Jańa normalar aiasynda Túrkistan shaharyn elimizdiń sáýlet, rýhani, tarihi-mádeni jáne týristik ortalyǵy retinde damytý úshin keshendi sharalar kózdelgen. Osyǵan bailanysty ortalyq jáne jergilikti memlekettik organdardyń ókilettikteri qaita qaraldy. Sonymen qatar injenerlik, kóliktik, áleýmettik jáne týristik infraqurylymdy damytý máseleleri jan-jaqty rettelip otyr. Maquldanǵan zańdar Túrkistannyń jan-jaqty damýyna somdy úlesin qosady dep senemiz, – dedi Máýlen Áshimbaev.
Bul zań arqyly Qoja Ahmet Iasaýi kesenesiniń biregeiligin saqtaý úshin keseneniń qorǵaý aimaǵynyń shekarasynan bir júz metr qashyqtyqta biiktigi jeti metrden asatyn jáne aýqymy, túsi jáne qurylys materialdary boiynsha tarih jáne mádeniet eskertkishterimen úilespeitin obektiler salýǵa jol berilmeitin boldy.
Zańdarda múgedektigi bar adamdar úshin qolaily jaǵdailardy qamtamasyz etýge jáne inkliýzivti týrizmdi damytýǵa arnalǵan túzetýler de qarastyrylǵan. Bul rette infraqurylymnyń kedergisiz qoljetimdiligin qamtamasyz etý kózdelip otyr.
Sonymen qatar ákimdikter men máslihattardyń quzyretteri qaita qaraldy. Endi qala aýmaǵynda tarihi-mádeni mura obektilerin qorǵaý jáne paidalaný salasynda memlekettik baqylaýdy júzege asyrý, jergilikti biýdjet qarajaty esebinen qalanyń ulttyq qolóner salasyndaǵy sheberlerdiń shyǵyndarynyń bir bóligin óteý qaǵidalaryn ázirleý ákimdiktiń quzyretinde bolady.
Bul Túrkistan qalasynyń aýmaǵy arqyly tranzittik avtomobil kóligi qozǵalysynyń shemalary men tártibin kelisý rásimine de qatysty ekenin atap ótken jón. Osylaisha, atalǵan zańnamalyq normalar qalanyń tarihi-mádeni mańyzy bar eskertkishteri men obektilerin, onyń ishinde dúniejúzilik mura – Qoja Ahmet Iassaýi kesenesin qorǵaý aimaǵynda ornalasqan nysandardy basqarý men saqtaýdyń tiimdi júiesin qalyptastyrýǵa arnalyp otyr.
