Álemdik naryqta munai baǵasy AQSh prezidenti Donald Tramptyń Ormýz buǵazynyń jaqyn arada qaita ashylatyny týraly málimdemesinen keiin tómendei tústi, dep habarlaidy dalanews.kz.
Saýda barysynda Brent markaly munai fiýchersteriniń quny bir barrel úshin 82,68 dollarǵa deiin tústi. Buǵan deiin onyń baǵasy 84 dollar deńgeiinde bolǵan. Al amerikalyq WTI markaly munaidyń baǵasy 80,63 dollarǵa deiin arzandady. Buǵan deiin bul kórsetkish 81 dollardy quraǵan.
Sarapshylardyń aitýynsha, munai baǵasynyń kúrt tómendeýi AQSh pen Irannyń beibit kelisimge kelgeni týraly málimdemelerden keiin bastalǵan.
Naryq qatysýshylary bul kelisim aimaqtaǵy geosaiasi táýekelderdi azaityp, Ormýz buǵazy arqyly munai tasymalynyń qalypty rejimde jalǵasýyna múmkindik beredi dep baǵalap otyr.
Aita keteiik, Ormýz buǵazy álemdik munai tasymalynyń mańyzdy baǵyttarynyń biri sanalady. Sondyqtan ondaǵy ahýal munai baǵasyna tikelei áser etedi.
