Áskeri qyzmetshi qyzmettik baspanaǵa qatysty daýda Qorǵanys ministrligin sotta jeńip shyqty, dep habarlaidy dalanews.kz.
Is materialdaryna sáikes, 2009 jyly áskeri qyzmetshige tórt adamnan turatyn otbasymen birge turý úshin qyzmettik páter berilgen. 2025 jyly ol turǵyn úidi jaldaý shartyn uzartýǵa ótinish bildirgen. Alaida Qorǵanys ministrligi áskeri qyzmetshiniń qyzynyń menshiginde páter bar ekenin alǵa tartyp, ótinishti qanaǵattandyrýdan bas tartqan.
Sot barysynda talapkerdiń kámeletke tolǵan balalary bólek turyp, derbes sharýashylyq júrgizetini anyqtaldy. Sondai-aq sot kámeletke tolǵan ári ata-anasynan bólek turatyn otbasy múshesiniń jeke baspanasynyń bolýy qyzmettik turǵyn úidi jaldaý shartyn uzartýdan bas tartýǵa negiz bola almaitynyn atap ótti.
Sot sheshiminde ministrliktiń istiń barlyq mán-jaiyn jan-jaqty ári tolyq zerttemegeni kórsetilgen.
Nátijesinde sot talap aryzdy qanaǵattandyryp, Qorǵanys ministrligine áskeri qyzmetshiniń ótinishin qaita qaraýdy mindettedi.
