Ónerkásip jáne qurylys ministrligi ókilderi turǵyn úilerdiń mańyna kólik qoiýǵa tyiym salynatyny týraly aqparatqa qatysty pikir bildirdi, dep habarlaidy dalanews.kz.
Keiingi kúnderi áleýmettik jeliler men birqatar buqaralyq aqparat quralynda "2026 jylǵy 1 shildeden bastap turǵyn úilerdiń mańyna kólik qoiýǵa tyiym salynatyny" týraly aqparat tarady. Alaida Ónerkásip jáne qurylys ministrligi bul málimet shyndyqqa janaspaitynyn habarlady.
Vedomstvo aqparatyna súiensek, "Qalalar men eldi mekender aýmaqtaryn abattandyrýdyń úlgilik qaǵidalaryn bekitý týraly" buiryqta turǵyn úiler mańyndaǵy avtoturaqtarǵa qatysty jańa shekteý qarastyrylmaǵan.
Ministrlik qujattyń basty maqsaty Qurylys kodeksi talaptaryna sáikestendirý jáne abattandyrý salasyndaǵy burynnan bar qoldanystaǵy normalardy jańartylǵan redaktsiiada bekitý ekenin atap ótti.
Sondai-aq, jańa qaǵidalarda azamattardyń arnaiy belgilengen avtoturaq oryndaryna kólik qoiýyna tyiym salatyn talap joq. Ózgeristerdiń bir bóligi tek naqtylaý sipatynda engizilgen. Iaǵni jeke turǵyn úilerge irgeles aýmaqta uzaq ýaqyt saqtaýǵa bolmaityn jyljymaly múlikter tizimi naqtylanǵan. Jańa redaktsiiada mundai múlik qataryna kólikter, tirkemeler men arbalar engizilgen.
Alaida bul kólikti paidalanýǵa nemese arnaiy bólingen oryndarǵa qoiýǵa tyiym salý degendi bildirmeidi. Áńgime ortaq paidalanylatyn aýmaqta túrli múlikti uzaq ýaqyt boiy jinap qoiýdyń aldyn alý týraly bolyp otyr.
