پارلامەنت سەناتىنىڭ سپيكەرى ماۋلەن اشىمبايەۆتىڭ توراعالىعىمەن پالاتا وتىرىسى ءوتتى. وندا سەناتورلار تۇركىستان قالاسىنىڭ ەرەكشە مارتەبەسىنە قاتىستى زاڭداردى قارادى جانە وزدەرىنىڭ دەپۋتاتتىق ساۋالدارىن جولدادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
سەناتتاعى وتىرىس بارىسىندا سەناتورلار «تۇركىستان قالاسىنىڭ ەرەكشە مارتەبەسى تۋرالى» زاڭدى جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇركىستان قالاسىنىڭ ەرەكشە مارتەبەسى جانە شەت ەلدەگى مادەنيەت ورتالىقتارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارادى.
اتالعان زاڭداردىڭ نورمالارى تۇركىستاندى قازاقستاننىڭ رۋحاني-مادەني، تاريحي جانە تۋريستىك ورتالىعى رەتىندە دامىتۋ ءۇشىن قۇقىقتىق جاعدايلار جاساۋعا، سونداي-اق، تاريحي-مادەني مۇرانى قورعاپ، رۋحاني نىسانداردىڭ بىرەگەيلىگىن ساقتاۋعا باعىتتالعان.
– مەملەكەت باسشىسى قاسىم-جومارت كەمەل ۇلى توقايەۆ تۇركى الەمىنىڭ التىن بەسىگى – تۇركىستان قالاسىنا ەرەكشە مارتەبە بەرۋ تۋرالى ماسەلەنى وبلىس جۇرتشىلىعىمەن كەزدەسۋىندە كوتەرگەن بولاتىن. پرەزيدەنتىمىزدىڭ تاپسىرماسىن ورىنداۋ ءۇشىن ارنايى زاڭ ازىرلەنىپ، ماقۇلداندى. جاڭا نورمالار اياسىندا تۇركىستان شاھارىن ەلىمىزدىڭ ساۋلەت، رۋحاني، تاريحي-مادەني جانە تۋريستىك ورتالىعى رەتىندە دامىتۋ ءۇشىن كەشەندى شارالار كوزدەلگەن. وسىعان بايلانىستى ورتالىق جانە جەرگىلىكتى مەملەكەتتىك ورگانداردىڭ وكىلەتتىكتەرى قايتا قارالدى. سونىمەن قاتار ينجەنەرلىك، كولىكتىك، الەۋمەتتىك جانە تۋريستىك ينفراقۇرىلىمدى دامىتۋ ماسەلەلەرى جان-جاقتى رەتتەلىپ وتىر. ماقۇلدانعان زاڭدار تۇركىستاننىڭ جان-جاقتى دامۋىنا سومدى ۇلەسىن قوسادى دەپ سەنەمىز، – دەدى ماۋلەن اشىمبايەۆ.
بۇل زاڭ ارقىلى قوجا احمەت ياساۋي كەسەنەسىنىڭ بىرەگەيلىگىن ساقتاۋ ءۇشىن كەسەنەنىڭ قورعاۋ ايماعىنىڭ شەكاراسىنان ءبىر ءجۇز مەتر قاشىقتىقتا بيىكتىگى جەتى مەتردەن اساتىن جانە اۋقىمى، ءتۇسى جانە قۇرىلىس ماتەريالدارى بويىنشا تاريح جانە مادەنيەت ەسكەرتكىشتەرىمەن ۇيلەسپەيتىن وبەكتىلەر سالۋعا جول بەرىلمەيتىن بولدى.
زاڭداردا مۇگەدەكتىگى بار ادامدار ءۇشىن قولايلى جاعدايلاردى قامتاماسىز ەتۋگە جانە ينكليۋزيۆتى ءتۋريزمدى دامىتۋعا ارنالعان تۇزەتۋلەر دە قاراستىرىلعان. بۇل رەتتە ينفراقۇرىلىمنىڭ كەدەرگىسىز قولجەتىمدىلىگىن قامتاماسىز ەتۋ كوزدەلىپ وتىر.
سونىمەن قاتار اكىمدىكتەر مەن ءماسليحاتتاردىڭ قۇزىرەتتەرى قايتا قارالدى. ەندى قالا اۋماعىندا تاريحي-مادەني مۇرا وبەكتىلەرىن قورعاۋ جانە پايدالانۋ سالاسىندا مەملەكەتتىك باقىلاۋدى جۇزەگە اسىرۋ، جەرگىلىكتى بيۋدجەت قاراجاتى ەسەبىنەن قالانىڭ ۇلتتىق قولونەر سالاسىنداعى شەبەرلەردىڭ شىعىندارىنىڭ ءبىر بولىگىن وتەۋ قاعيدالارىن ازىرلەۋ اكىمدىكتىڭ قۇزىرەتىندە بولادى.
بۇل تۇركىستان قالاسىنىڭ اۋماعى ارقىلى ترانزيتتىك اۆتوموبيل كولىگى قوزعالىسىنىڭ سحەمالارى مەن ءتارتىبىن كەلىسۋ راسىمىنە دە قاتىستى ەكەنىن اتاپ وتكەن ءجون. وسىلايشا، اتالعان زاڭنامالىق نورمالار قالانىڭ تاريحي-مادەني ماڭىزى بار ەسكەرتكىشتەرى مەن وبەكتىلەرىن، ونىڭ ىشىندە دۇنيەجۇزىلىك مۇرا – قوجا احمەت ياسساۋي كەسەنەسىن قورعاۋ ايماعىندا ورنالاسقان نىسانداردى باسقارۋ مەن ساقتاۋدىڭ ءتيىمدى جۇيەسىن قالىپتاستىرۋعا ارنالىپ وتىر.
