Túrkistan oblysy ákimi Darhan Satybaldynyń tóraǵalyǵymen Túrkistandaǵy halyqaralyq áýejaidy damytý, áleýetin kóterý jóninde jinalys ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Túrkistan oblysy ákiminiń birinshi orynbasary Zulpyhar Joldasov pen áýejaiǵa jaýapty ókilderdiń esepteri, josparlary tyńdaldy.
Oblys ákimi áýejaidyń damý josparyn týrizmmen úilestirý kerektigin aitty. Qazirgi kórsetkishterge kóńili tolmaitynyn jetkizdi.
– Jolaýshylar kóligi men týrizmge jaýapty basqarmalar birlese jospar ázirlep, jumysty júielesin. Áýejaidyń múmkindigin tiimdi paidalaný kerek. Jańa týristik baǵyttar, nysandar, ideialar usynyp, júzege asyryńyzdar. Bolmaidy bylai. Basshylyq qyzmet, jaýapkershilik júktelgennen soń el senimin aqtaý úshin bar kúshterińizdi salýlaryńyz kerek.
Áýejai basshylyǵy da áýejaidy damytý, tabysyn kóterý, jolaýshylar aǵynyn kóbeitý úshin jumys isteýi shart. Sheteldiń tájiribesin zertteńizder, halyqaralyq áýe kompaniialarymen bailanysty nyǵaityńyzdar, – dedi Darhan Satybaldy.
«Áziret Sultan» halyqaralyq áýejaiy 4 halyqaralyq (Ystambul, El-Kýveit, Abý-Dabi, Samarqan) jáne 6 respýblikaishilik (Astana, Almaty, Aqtaý, Aqtóbe, Oral, Qostanai) áýe baǵyttaryna qyzmet kórsetýde. Reisterdi «Turkish Airlines», «Jazeera Airways», «Wizz Air Abu Dhabi», «Fly Arystan», «Scat», «Qazaq Air» áýekompaniialary oryndaidy. Áýejai aptasyna 32 reisti qabyldaidy.
Áýejaiǵa halyqaralyq aviatsiialyq uiymdardyń ICAO jáne IATA (ICAO — UAIT, IATA — HSA) kodtary berildi. Áýejaidyń ótkizý qabileti saǵatyna – 450, jylyna 3 million jolaýshyny quraidy. 2023 jyly jolaýshylar aǵyny 359,5 myń jolaýshyny qurady (halyqaralyq – 65,1 myń jolaýshy, ishki – 294,4 myńnan asty).
Jiynda jaýapty tulǵalardyń josparlary, usynystary tyńdaldy. Arnaiy týrpaketter ázirlep, týristerdi tartýdyń mańyzdylyǵy aityldy. Osy baǵytta jumys jandanady. Sonymen birge halyqaralyq baǵyttar sanyn kóbeitý baǵytynda da kelissózder jalǵasady.
