Mereıtoı aıasynda aýdandaǵy M.H.Dýlatı atyndaǵy aýdandyq mádenıet úıinde «Tamyry tereń, tarıhy kemel – Túrkibasy» atty ǵylymı-praktıkalyq konferensıa ótti. Basqosýda alǵashqy sóz kezegin alǵan oblys ákimi J.Túımebaev aýdan turǵyndaryn aıtýly merekemen quttyqtady.
– Prezıdentimiz «Bolashaqqa baǵdar: rýhanı jańǵyrý» baǵdarlamalyq maqalasynda Qazaqstannyń qasıetti oryndary, kıeli jerleri týraly erekshe jazǵan. Túrkistan oblysynda qasıetti de kıeli oryndar kóp. Bıyl bizdiń óńirde birneshe aýdan ózderiniń toqsan jyldyǵyn atap ótedi. Osy aýdan, aımaqtardyń bári de kıeli, qasıetti. Solardyń biri ári biregeıi — Túlkibas aýdany, Túrkibasy aımaǵy Qarataý men Alataýdyń túıisken tóri. Tarıhy tereń, tabıǵaty tańǵajaıyp Túlkibas aýdanynyń qurylǵanyna 90 jyl tolyp otyr. Elbasymyz aıtqandaı, toıdy da toılaý kerek, oıdy da oılaý kerek. Árbir toı, jańa jumystardyń tolaǵaı, tirlikterdiń bastaýy bolýy tıis. Túrkibasy áýlıe qasıetti ornynyń jaqsarýy, jańǵyrýy qut bereke ákelsin, – dedi Janseıit Qanseıituly.
Konferensıada oblys basshysy aýdannyń bir top azamattaryn Alǵys hatpen marapattady. Konferensıada qoǵam qaıratkeri Z.Turysbekov, ǵalymdar M.Myrzahmetov, D.Qojamjarova jáne D.Qamzabek baıandama jasap, jan-jaqty talqylanyp, taldady.
Merekelik jıyn T.Rysqulov aýylyndaǵy «Tuńǵysh Prezıdent» saıabaǵynda jalǵasyn tapty. Saıabaqta ónerpazdar óz ónerlerin tartý etse, sporttyq jarystar men «Jaıdarman» oıyny buqara halyqtyń kóńilin kóterdi.
Sondaı-aq, merekelik sharada aýdan qolóner sheberleri kórmesi qoıyldy. Merekeniń jalǵasy respýblıkaǵa, oblysqa tanymal ánshilerdiń gala konsertimen jalǵasyp, is-shara sońy merekelik otshashýmen aıaqtaldy.
Túrkistan oblysy ákiminiń baspasóz qyzmeti
