18 naýryzda Donald Tramp pen Vladimir Pýtin telefon arqyly sóilesip, Ýkrainadaǵy jaǵdaidy talqylady, dep habarlaidy Dalanews.kz.
Áńgime ne týraly boldy?
Kelissózder nátijesinde Pýtin bir ai boiy energetikalyq jáne infraqurylymdyq nysandarǵa shabýyl jasamaýǵa kelisim berdi. Degenmen, Resei tarapy belgili bir sharttardy alǵa tartty. Kremldiń habarlaýynsha, bitim kezinde Ýkraina mobilizatsiia júrgizbeýi tiis, áskeri qarýlaný toqtatylady, al Kievke baǵyttalǵan áskeri kómek tolyqtai doǵarylýy kerek.
Kelisim aiasynda sarapshylardan quralǵan arnaiy top jumys isteitin bolady. Sonymen qatar, búgin eki tarap 175 tutqynmen almasýdy josparlap otyr. Resei gýmanitarlyq qadam retinde aýyr jaralanǵan 35 ýkrain sarbazyn bosatýdy uiǵarǵan.
Eýropa elderi bul beibit bastamany qoldap otyr. Ýkraina Prezidenti Vladimir Zelenskii de 30 kúndik atysty toqtatý týraly kelisimge keldi.
«Bul – Pýtinniń erejesimen júretin oiyn emes. Áskeri kómek jalǵasady dep oilaimyn. Bizdi AQSh pen eýropalyq seriktesterimiz qoldaidy. Biz olarmen turaqty bailanystamyz. Seriktester tarapynan eshqandai satqyndyq bolmaitynyna jáne áskeri kómektiń jalǵasatynyna senimdimin», – dedi Zelenskii.
Biraq...
Biraq búgin Zelenskii keshke Resei kelisimge qaramastan drondarmen azamattyq infraqurylymǵa soqqy jasaǵanyn málimdedi.
"Áýede shamamen 40 “shahed” júr, áýe qorǵanys júiesi istep tur” dep jazdy Zelenskii sársenbige qaraǵan túni óziniń paraqshasynda.
Zelenskiidiń sózinshe, túngi shabýyldan qiraǵan jáne búlingen nysandar bar. Mysaly, Sýmydaǵy aýrýhanaǵa “shahed” túsken, Donetsk oblysyndaǵy qalalarǵa soqqy jasalǵan. Ol turaqty beibitshilikke qol jetkizý úshin Reseige qysymdy údetý kerektigin aitty.
Toqaevtyń reaktsiiasy
18 naýryzda prezident Qasym-Jomart Toqaev Tramp Pýtinniń áńgimelesýine qatysty pikir bildirgen bolatyn.
Qasym-Jomart Toqaev Vladimir Pýtin men Donald Tramptyń Ýkraina boiynsha telefon arqyly kelissóziniń qorytyndysyn quptady.Prezident eki eldiń kóshbasshylary naqty ýaǵdalastyqtar negizinde Eýraziia keńistigindegi qaýipsizdikti qamtamasyz etý úshin asa mańyzdy uzaqmerzimdi beibitshilikke qol jetkizýge nietti ekenderin kórsetti dep sanaidy.
"Memleket basshysy buǵan deiin barlyq derjavalardy Ýkraina boiynsha «Beibitshilik formýlasyn» ázirleý maqsatynda kelissózder protsesin bastaýǵa shaqyryp, BRIKS sammitinde Qytai men Braziliianyń beibitshilik josparyn qoldaǵan bolatyn", delingen habarlamada.
Saiasattanýshynyń pikiri
Belgili saiasattanýshy Ǵaziz Ábishev eki jaqtyń ritorikasy úmit uialatatynyn aitty.
"Qazaqstan kelissózderdiń qorytyndysyn quptady. Prezident Qasym-Jomart Toqaevtyń aitýynsha, qos memlekettiń kóshbasshylary uzaq merzimdi beibitshilikke qol jetkizýge umtylysyn kórsetti. Aita ketý kerek, resmi Astana qaqtyǵys bastalǵan sátten beri bir ǵana ustanymdy ustanyp keledi: soǵystyń máni joq, tezirek kelissózderge otyrý qajet. Bul rette tek naqty áskeri is-qimyl aimaqtaryn ǵana emes, jalpy Eýraziia qurlyǵyndaǵy ujymdyq qaýipsizdikti de talqylaý mańyzdy.
Bul ustanym jahandyq qaqtyǵystyń eki jaǵyndaǵy «soǵys jeńispen aiaqtalǵansha jalǵasýy kerek» dep málimdegen qyzý pikirdegi saiasatkerlerden ózgeshe. Mundai jeńiske jetý múmkin emestigin Qazaqstan basshysy birneshe ret ashyq jáne jabyq formatta atap ótken bolatyn", deidi Ábishev.
