AQSh prezidenti Donald Tramp Vashingtonnyń Ormýz buǵazy arqyly ótetin kemelerdi alyp júrýge baǵyttalǵan «Bostandyq jobasy» operatsiiasyn ýaqytsha toqtatatynyn málimdedi, dep habarlaidy dalanews.kz.
Tramp bul sheshimdi Iranmen yqtimal kelisim boiynsha júrgizilip jatqan kelissózderdegi «eleýli ilgerileýmen» bailanystyrǵan.
Ol Truth Social jelisinde jariialaǵan jazbasynda Pákistan men basqa da elderdiń ótinishi, Iranǵa qarsy naýqan kezindegi áskeri jetistik jáne Iran ókilderimen tolyq ári túpkilikti kelisim daiyndaýdaǵy aitarlyqtai progress eskerilgenin aitty.
«Biz ózara kelisimge keldik: blokada kúshinde qalady, alaida Ormýz buǵazy arqyly kemelerdiń qozǵalysyna qatysty iske qosylǵan “Bostandyq jobasy” qysqa merzimge toqtatylady. Bul tolyq kelisimdi pysyqtap, oǵan qol qoiý múmkindigin baǵalaý úshin qajet», – dep jazdy Tramp.
Aq úi ázirge qandai naqty ilgerileý bolǵanyn jáne operatsiianyń qansha ýaqytqa toqtatylǵanyn naqtylaǵan joq.
