Belgili reseilik saiasattanýshy Arkadii Dýbnov Qazaqstan prezidenti Qasym-Jomart Toqaevtyń Ýkraina táýelsizdik kúnine bailanysty joldaǵan quttyqtaýyna pikir bildirdi, dep habarlaidy Dalanews.kz.
Saiasattanýshynyń aitýynsha, mundai qadam airyqsha batyldyqtyń belgisi. Óitkeni TMD-daǵy memleket basshylarynyń kóbi Kievti jeke quttyqtaýdan tartynyp, tek «ýkrain halqyna» degen resmi joldaýlarmen shektelgen.
"Tek eki lider – Armeniia premer-ministri Nikol Pashinian men Qazaqstan prezidenti Qasym-Jomart Toqaev Ýkraina prezidenti Vladimir Zelenskiidi jeke quttyqtaýǵa sheshim qabyldady", – dedi Dýbnov.
Sarapshy 1991 jylǵy oqiǵalardy eske túsirdi. Onyń aitýynsha, 24 tamyz kúni, GKChP tóńkerisi sátsiz aiaqtalǵannan keiin, Kievte Ýkrain KSR Joǵarǵy keńesiniń kezekten tys sessiiasy ótip, Ýkraina táýelsizdigi týraly Akt qabyldandy.
"Debattar uzaqqa sozyldy, biraq qujattaǵy tujyrym erekshe boldy: "Memlekettik tóńkeris saldarynan Ýkrainaǵa tóngen ólim qateri". Bul formýlirovkany dissident Levko Lýkianenko usyndy", – dep eske aldy Dýbnov.
Lýkianenko kezinde Keńes sotymen atý jazasyna kesilip, keiin 15 jyl lagerde otyrǵan. Onyń usynysy tarihi turǵyda KSRO-men túbegeili ajyrasýdy bekitti. Al 1991 jylǵy 1 jeltoqsanda ótken referendýmda ýkrainderdiń 90%-y táýelsizdikti qoldap, bul Belovej kelisimderine tikelei jol ashty.
Dýbnov Toqaevtyń quttyqtaýyn diplomatiialyq turǵydan da mańyzdy dep baǵalady. Ol atap ótkendei, quttyqtaýdyń aldynda Toqaev pen Frantsiia prezidenti Emmaniýel Makron arasynda telefon arqyly sóilesý ótken. Áńgimede Ýkrainadaǵy soǵys ta qozǵalǵanymen, Aqordanyń resmi habarlamasynda bul taqyryp kórsetilmegen.
"Prezident Toqaev taǵy da soǵysyp jatqan taraptardyń eshqaisysyna birjaqty bet burmaitynyn dáleldedi. Ol Ýkraina prezidentin jeke quttyqtap, óziniń diplomatiialyq ustanymyn kórsetti. Men muny qoldaimyn", – dep túiindedi saiasattanýshy.
Aita keteiik, 24 tamyzda Qasym-Jomart Toqaev Vladimir Zelenskiige Ýkraina halqyn Táýelsizdik kúnimen quttyqtap, resmi telegramma joldady.
