Prezident Qasym Jomart Toqaev Úkimettiń keńeitilgen otyrysynda ekonomikalyq ósim, biýdjet tártibi, tsifrlandyrý jáne áleýmettik saiasattaǵy sozbalań men formalizmdi ashyq synǵa alyp, tek naqty nátije ǵana baǵalanatynyn málimdedi, dep habarlaidy Dala News.
Qazaqstan jańa saiasi jáne ekonomikalyq kezeńge naqty qadam basyp otyr. Úkimettiń keńeitilgen otyrysynda Qasym Jomart Toqaevtyń aitqan sózderi eldi basqarý júiesinde jinalyp qalǵan júieli máselelerdi ashyq ári qatqyl formada kórsetti. Memleket basshysy úshin bul jolǵy basymdyq deklaratsiia emes, naqty nátije ekeni anyq baiqaldy.
Prezident ekonomikalyq saiasattaǵy basty túitkil retinde turaqty ósimniń joqtyǵyn atady. Onyń aitýynsha, qazirgi syn qaterlerge beiimdele alatyn, ónimdilik pen tehnologiialyq jańarýǵa negizdelgen jańa model qajet. Memleket naryqqa tek baqylaýshy emes, strategiialyq baǵyt berýshi retinde aralasýy tiis. Bul tásil ulttyq tabysty azamattar arasynda ádil bólýge múmkindik beredi.
Infliatsiia máselesine kelgende Prezident burynǵydai abstraktili ýáde men uzaq talqylaýǵa jol joq ekenin eskertti. Úkimet pen Ulttyq bankke úsh jyl ishinde infliatsiiany naqty tómendetýge baǵyttalǵan kezeń kezeńimen oryndalatyn ortaq algoritm ázirleý tapsyryldy. Memleket basshysy nátijesiz talqylaý, qajetsiz jol kartalary men ýaqyt utý áreketterin jaýapkershilikten jaltarý dep baǵalaitynyn ashyq aitty. Baǵa ósimin aýyzdyqtaý halyqtyń naqty tabysyn arttyrýǵa alyp kelýi tiis.
Salyq jáne biýdjet saiasaty da Prezident nazarynan tys qalǵan joq. Jańa Salyq kodeksiniń engizilýi ekonomikany tártipke keltirýdiń quraly bolýy kerek. Memleket basshysy alǵashqy oń nátijeler bar ekenin atap ótti, alaida biýdjet túsimin arttyrý bizneske qysym kórsetý arqyly júzege aspaýǵa tiis ekenin qatań eskertti. Negizgi basymdyq salyqtyq ákimshilendirýdiń sapasyn arttyrý men tsifrlandyrýǵa berilýi qajet.
Biýdjet shyǵystary boiynsha Prezidenttiń syny tipti qatqyl boldy. Ol tiimsiz baǵdarlamalardy tolyq reviziiadan ótkizýdi talap etip, qarjyny igerý úshin ǵana bólý tájiribesin toqtatýdy tapsyrdy. Memlekettik investitsiia azamattarǵa naqty paida ákeletin jáne ulttyq ekonomikany damytatyn jobalarǵa ǵana baǵyttalýy tiis. Tańdaýly toptarǵa sýbektivti túrde qarjy bólý memleket múddesine qarsy áreket retinde baǵalanatyny ashyq aityldy.
Aimaqtyq saiasatta da jaýapkershilik máselesi ótkir qoiyldy. Sońǵy jyldary óńirlerdiń kiris qory artqanymen, qarjylyq tártip pen josparlaý sapasy birdei deńgeide damymaǵan. Prezident jergilikti bilikke júkteletin mindetter men beriletin resýrstardyń sáikestigi saqtalýy kerek ekenin atap ótti. Qazaqstan ýnitarly memleket retinde barlyq deńgeide birlesip áreket etýge tiis.
Infraqurylym máselesine kelgende Memleket basshysy óńirler arasyndaǵy alshaqtyqty jasyrmady. El boiynsha qamtylý deńgeii orta eseppen 64 paiyzdy qurasa da, Abai, Ulytaý jáne Almaty oblystarynda jaǵdai kúrdeli. Infraqurylymnyń joqtyǵy óńirlik damýǵa tikelei kedergi keltirip otyr. Prezident aimaq basshylaryn ekonomikany ártaraptandyrýǵa, investitsiia tartýǵa jáne jańa jumys oryndaryn qurýǵa mindettedi.
Tsifrlyq memleket qurý máselesi Prezident úshin jeke strategiialyq baǵyt retinde aiqyndaldy. Ol tsifrlandyrýdy barlyq kemshilikti jasyratyn syltaý retinde qoldanýdy ashyq synǵa aldy. Jasandy intellekt pen tsifrlyq tehnologiialar basqarý sapasyn arttyrýǵa, shyǵyndy qysqartýǵa jáne sheshim qabyldaýdy jedeldetýge qyzmet etýi tiis. Áitpese, aýqymdy josparlardyń bári qaǵaz júzinde qalyp qoiady.
Prezident biryńǵai tsifrlyq platformaǵa kóshýdiń mańyzyn erekshe atap ótti. Buǵan deiin vedomstvolardyń tsifrlandyrýdy baqylaýsyz júrgizýi tehnikalyq aqaýlar men biýdjet shyǵynyna alyp kelgen. Endi barlyq tsifrlyq ózgeris QazTech platformasynyń negizinde iske asýy tiis.
Kiberqaýipsizdik pen derbes derekterdi qorǵaý da kún tártibindegi ózekti másele retinde kóterildi. Onlain alaiaqtyq pen derekterdiń taralýy qalypty qubylysqa ainalyp bara jatqanyn aitqan Prezident bul baǵytta keshendi sheshimder qabyldaýdy tapsyrdy. Ulttyq antifrod ortalyǵynyń jumysy nátijesinde ondaǵan myń azamattyń qarjysyn saqtap qalý múmkin bolǵany atap ótildi.
Áleýmettik salany tsifrlandyrýda da Prezident tiimdilik máselesin alǵa qoidy. Biýdjettiń qomaqty bóligi bólingenimen, onyń naqty nátijesi suraq týdyryp otyr. Áleýmettik kómek naqty muqtaj adamdarǵa jetýi úshin úi sharýashylyqtarynyń tsifrlyq profili men áleýmettik ámiian júiesin jedel engizý qajet.
Bilim berý salasynda da júieli problemalar bar ekeni jasyrylmady. Prezident kadr daiarlaý júiesi tehnologiialyq ózgeristerge ilese almai otyrǵanyn atap ótti. Elge jasandy intellektini naqty óndiriste qoldana alatyn mamandar qajet. Osy maqsatta ulttyq mamandyqtar transformatsiiasy ortalyǵyn qurý tapsyryldy.
Jalpy, Úkimettiń keńeitilgen otyrysynda aitylǵan sózder memleket basqarýdaǵy jańa talaptardyń belgisi boldy. Prezident naqty nátije bermeitin sheshimder men jaltarý áreketterine endi jol berilmeitinin ashyq kórsetti. Alǵa qoiylǵan mindetterdiń oryndalýy Úkimet pen óńirler úshin saiasi jaýapkershiliktiń naqty ólshemine ainalmaq.
