Prezidenttiń kómekshisi ári baspasóz hatshysy Rýslan Jeldibai memleket basshysy Qasym-Jomart Toqaev pen AQSh basshysy Donald Tramp ne týraly sóileskenin aitty, dep habarlaidy Dalanews.kz.
Birqatar BAQ ókilderi Davosta ótken Beibitshilik keńesiniń Jarǵysyna qol qoiý rásiminde Memleket basshysy men Amerika Prezidenti arasyndaǵy qysqasha áńgimeniń mazmunyna qatysty saýal joldaǵan.
"Qasym-Jomart Toqaev Davos forýmynda taratylǵan "Prezident Donald Tramptyń 365 kún ishindegi 365 jeńisi" dep atalatyn resmi qujattyń 177-tarmaǵynda Qazaqstannyń Ibrahim kelisimderine qosylǵany jetistik retinde kórsetilgenine nazar aýdardy. Budan bólek, Prezident Amerika kóshbasshysyna aqyl-parasatqa negizdelgen ishki saiasatty júzege asyrýda tabys tiledi", - deidi Rýslan Jeldibai.
Onyń sózinshe, Donald Tramp Beibitshilik keńesin qurý týraly bastamasyna qoldaý kórsetkeni úshin Qasym-Jomart Toqaevqa alǵys aitqan.
Eske salaiyq, buǵan deiin Memleket basshysy Qasym-Jomart Toqaev AQSh Prezidenti Donald Tramptyń bastamasymen qurylǵan Beibitshilik keńesiniń jarǵysyna qol qoiǵanyn habarlaǵan edik.
Qol qoiý rásimine Qazaqstan Prezidentinen basqa 18 eldiń basshylary men ókilderi qatysty.
