پرەزيدەنتتٸڭ كٶمەكشٸسٸ ەرٸ باسپاسٶز حاتشىسى رۋسلان جەلدٸباي مەملەكەت باسشىسى قاسىم-جومارت توقاەۆ پەن اقش باسشىسى دونالد ترامپ نە تۋرالى سٶيلەسكەنٸن ايتتى, دەپ حابارلايدى Dalanews.kz.
بٸرقاتار باق ٶكٸلدەرٸ داۆوستا ٶتكەن بەيبٸتشٸلٸك كەڭەسٸنٸڭ جارعىسىنا قول قويۋ رەسٸمٸندە مەملەكەت باسشىسى مەن امەريكا پرەزيدەنتٸ اراسىنداعى قىسقاشا ەڭگٸمەنٸڭ مازمۇنىنا قاتىستى ساۋال جولداعان.
"قاسىم-جومارت توقاەۆ داۆوس فورۋمىندا تاراتىلعان "پرەزيدەنت دونالد ترامپتىڭ 365 كٷن ٸشٸندەگٸ 365 جەڭٸسٸ" دەپ اتالاتىن رەسمي قۇجاتتىڭ 177-تارماعىندا قازاقستاننىڭ يبراھيم كەلٸسٸمدەرٸنە قوسىلعانى جەتٸستٸك رەتٸندە كٶرسەتٸلگەنٸنە نازار اۋداردى. بۇدان بٶلەك, پرەزيدەنت امەريكا كٶشباسشىسىنا اقىل-پاراساتقا نەگٸزدەلگەن ٸشكٸ ساياساتتى جٷزەگە اسىرۋدا تابىس تٸلەدٸ", - دەيدٸ رۋسلان جەلدٸباي.
ونىڭ سٶزٸنشە, دونالد ترامپ بەيبٸتشٸلٸك كەڭەسٸن قۇرۋ تۋرالى باستاماسىنا قولداۋ كٶرسەتكەنٸ ٷشٸن قاسىم-جومارت توقاەۆقا العىس ايتقان.
ەسكە سالايىق, بۇعان دەيٸن مەملەكەت باسشىسى قاسىم-جومارت توقاەۆ اقش پرەزيدەنتٸ دونالد ترامپتىڭ باستاماسىمەن قۇرىلعان بەيبٸتشٸلٸك كەڭەسٸنٸڭ جارعىسىنا قول قويعانىن حابارلاعان ەدٸك.
قول قويۋ رەسٸمٸنە قازاقستان پرەزيدەنتٸنەن باسقا 18 ەلدٸڭ باسشىلارى مەن ٶكٸلدەرٸ قاتىستى.
