Ulttyq quryltaida Prezident ekonomikany damytatyn jańa múmkindikterdi únemi izdep otyrý kerektigin aitty, dep habarlaidy Dalanews.kz.
Onyń sózine qaraǵanda, bizge ájeptáýir mýltiplikativtik nátije beretin jobalar qajet.
"Sol úshin Úkimetke biyl aýqymdy tórt infraqurylymdyq bastamany júzege asyrýdy tapsyramyn.
Eń aldymen qazir jumys istep turǵan 55 jylý ortalyǵyn tolyǵymen jóndeý qajet. Uzyndyǵy keminde 6,5 myń shaqyrym bolatyn injenerlik júieni jańǵyrtý kerek. Bul qadam azamattar men kásipkerlerge kórsetiletin kommýnaldyq qyzmettiń sapasyn arttyrýǵa múmkindik beredi", - dedi Memleket basshysy.
Ol baspana – jurttyń turmys sapasyn tanytatyn taǵy bir mańyzdy kórsetkish ekenin alǵa tartty.
"Biyl 1 naýryzdan bastap iske qosylǵan «Otaý» ipotekalyq baǵdarlamasy el ishinde úlken suranysqa ie bolyp otyr. Buǵan qosa aýyl jáne aýdan ortalyǵynyń turǵyndaryna arnalǵan jańa turǵyn úi baǵdarlamasyn qolǵa alý kerek. Bul rette áleýmettik turǵyda osal toptaǵy jandar úshin nesie ósimi 7 paiyzdan aspaýy qajet. Sonymen qatar satyp alý quqyǵymen jalǵa beriletin baspana sanyn birneshe ese kóbeitýdi Úkimetke tapsyramyn", - dedi Qasym-Jomart Toqaev.
Jeńildetilgen jańa ipotekanyń engizilýi jáne jalǵa beriletin turǵyn úidiń kóptep salynýy qurylys qarqynyn arttyrady. Qurylys salasynda júz myńdaǵan otandasymyz adal eńbek etip júr. Eń bastysy, bul baǵdarlama baspanaǵa muqtaj kóptegen adamnyń úi alýyna jol ashady.
