ۇلتتىق قۇرىلتايدا پرەزيدەنت ەكونوميكانى دامىتاتىن جاڭا مۇمكىندىكتەردى ۇنەمى ىزدەپ وتىرۋ كەرەكتىگىن ايتتى، دەپ حابارلايدى Dalanews.kz.
ونىڭ سوزىنە قاراعاندا، بىزگە اجەپتاۋىر مۋلتيپليكاتيۆتىك ناتيجە بەرەتىن جوبالار قاجەت.
"سول ءۇشىن ۇكىمەتكە بيىل اۋقىمدى ءتورت ينفراقۇرىلىمدىق باستامانى جۇزەگە اسىرۋدى تاپسىرامىن.
ەڭ الدىمەن ءقازىر جۇمىس ىستەپ تۇرعان 55 جىلۋ ورتالىعىن تولىعىمەن جوندەۋ قاجەت. ۇزىندىعى كەمىندە 6،5 مىڭ شاقىرىم بولاتىن ينجەنەرلىك جۇيەنى جاڭعىرتۋ كەرەك. بۇل قادام ازاماتتار مەن كاسىپكەرلەرگە كورسەتىلەتىن كوممۋنالدىق قىزمەتتىڭ ساپاسىن ارتتىرۋعا مۇمكىندىك بەرەدى"، - دەدى مەملەكەت باسشىسى.
ول باسپانا – جۇرتتىڭ تۇرمىس ساپاسىن تانىتاتىن تاعى ءبىر ماڭىزدى كورسەتكىش ەكەنىن العا تارتتى.
"بيىل 1 ناۋرىزدان باستاپ ىسكە قوسىلعان «وتاۋ» يپوتەكالىق باعدارلاماسى ەل ىشىندە ۇلكەن سۇرانىسقا يە بولىپ وتىر. بۇعان قوسا اۋىل جانە اۋدان ورتالىعىنىڭ تۇرعىندارىنا ارنالعان جاڭا تۇرعىن ءۇي باعدارلاماسىن قولعا الۋ كەرەك. بۇل رەتتە الەۋمەتتىك تۇرعىدا وسال توپتاعى جاندار ءۇشىن نەسيە ءوسىمى 7 پايىزدان اسپاۋى قاجەت. سونىمەن قاتار ساتىپ الۋ قۇقىعىمەن جالعا بەرىلەتىن باسپانا سانىن بىرنەشە ەسە كوبەيتۋدى ۇكىمەتكە تاپسىرامىن"، - دەدى قاسىم-جومارت توقايەۆ.
جەڭىلدەتىلگەن جاڭا يپوتەكانىڭ ەنگىزىلۋى جانە جالعا بەرىلەتىن تۇرعىن ءۇيدىڭ كوپتەپ سالىنۋى قۇرىلىس قارقىنىن ارتتىرادى. قۇرىلىس سالاسىندا ءجۇز مىڭداعان وتانداسىمىز ادال ەڭبەك ەتىپ ءجۇر. ەڭ باستىسى، بۇل باعدارلاما باسپاناعا مۇقتاج كوپتەگەن ادامنىڭ ءۇي الۋىنا جول اشادى.
