Qazaqstan Qytaida iri tehnologiialyq kompaniialardyń biri ByteDance-pen kelissóz júrgizgen. Bul týraly Qazaqtelekom tóraǵasy Baǵdat Mýsin málimdedi, dep habarlaidy Dalanews.kz.
Onyń aitýynsha, kezdesýde álemdik tsifrlyq infraqurylymnyń qalai qurylyp jatqany talqylanǵan. Mýsin qazirgi kezeńde basty basymdyq jyldamdyq, turaqtylyq jáne servistiń paidalanýshyǵa barynsha jaqyn bolýy ekenin atap ótti. Sondai-aq, ol bul kelissózderdiń tek pikir almasýmen shektelmegenin jetkizdi.
«Biz úshin pikir almasý ǵana emes, osyndai iri kompaniialardyń óz sheshimderin qalai aýqymdaitynyn jáne milliondaǵan qoldanýshy deńgeiinde trafikti qalai basqaratynyn túsiný mańyzdy boldy», - dedi ol.
Mýsinniń sózinshe, kezdesý barysynda jasandy intellekt quraldary, bultty tehnologiialar jáne infraqurylymdyq jobalardy birlesip damytý múmkindikteri qarastyrylǵan. Bul baǵytta data-ortalyqtar, munaralyq infraqurylym sekildi jobalar da sóz bolǵan.
Sonymen qatar, taraptar naqty máselelerge de toqtalǵan.
«Sonyń biri - bizdiń avtonomdy júiemiz úshin jergilikti CDN segmentin qurý týraly kelisim. Bul servistiń sapasyna tikelei áser etetin sheshim: kidiristi azaitady, júktelý jyldamdyǵyn arttyrady jáne platformanyń turaqty jumysyn kúsheitedi», - dedi Qazaqtelekom basshysy.
Onyń aitýynsha, mundai sheshim trafiktiń edáýir bóligin el ishinde ustap, júktemeni tiimdi basqarýǵa múmkindik beredi.
