Jaz mezgilinde kún sáýlesiniń astynda uzaq ýaqyt júrý teriniń qyzaryp, kúiip qalýyna ákelýi múmkin. Kópshilik mundai jaǵdaida airan jaǵyp nemese mai jaǵýdy durys kóredi. Alaida mamandar bul tásilderdiń kerisinshe ziian keltirýi múmkin ekenin aitady, dep habarlaidy dalanews.kz.
Kúnge kúigenin qalai bilýge bolady?
Kúnge kúigen kezde teride aldymen qyzarý, ashyp aýyrý, kúidirý sezimi paida bolady. Keibir jaǵdaida teri isinip, keiin qabyrshaqtana bastaidy. Aýyr kúiikter kezinde kúldireýikter shyǵyp, dene qyzýy kóterilýi múmkin.
Alǵashqy kómek
Eń aldymen kúnniń astynan dereý kóleńkege nemese úi ishine kirgen jón.
Odan keiin:
- terini salqyn sýmen nemese salqyn komprespen jeńil salqyndatý;
- salqyn dýsh qabyldaý;
- aloe vera nemese pantenol qosylǵan ylǵaldandyrǵysh krem jaǵý;
- aǵzanyń sýsyzdanýyn boldyrmaý úshin kóbirek taza sý ishý;
- birneshe kún boiy tikelei kún sáýlesinen saqtaný qajet.
Ne isteýge bolmaidy?
Kópshilik qoldanatyn halyqtyq tásilderdiń barlyǵy birdei qaýipsiz emes.
Mamandar myna áreketterden bas tartýǵa keńes beredi:
- terige muzdy nemese óte sýyq zattardy uzaq baspaý;
- qaimaq, airan nemese túrli mailardy jaqpaý;
- spirt, vazelin nemese siltili sabyn qoldanbaý;
- skrab pen piling jasamaý;
- retinol men qyshqyldary bar kosmetikalyq quraldardy ýaqytsha paidalanbaý.
Dárigerge qashan qaralý kerek?
Eger kúiik aýyr bolyp, denede kópirshikter paida bolsa, dene qyzýy kóterilse, bas ainalý, júrek ainý nemese qatty álsizdik baiqalsa, mindetti túrde dárigerdiń kómegine júgingen durys. Ásirese balalar men qart adamdarda kúnge kúiýdiń saldary aýyr bolýy múmkin.
Kúnge kúiýdiń aldyn alý joldary
Terini kúnniń ziiandy áserinen qorǵaý úshin:
- saǵat 10:00–16:00 aralyǵynda ashyq kún astynda uzaq júrmeýge;
- SPF 30 jáne odan joǵary qorǵanys kremderin qoldanýǵa;
- bas kiim kiip, deneni jabyq kiimmen qorǵaýǵa;
- kún saiyn jetkilikti mólsherde sý ishýge keńes beriledi.
Este saqtańyz: kúnge kúigen teri birneshe kúnde qalpyna kelýi múmkin. Biraq aýyr kúiik kezinde ózin-ózi emdeýmen ainalyspai, dárigerge qaralǵan durys. Ýaqytynda kórsetilgen kómek asqynýdyń aldyn alyp, teriniń tezirek jazylýyna múmkindik beredi.
