8 sáýirde TShO-ǵa qarasty merdiger kompaniia jumysshysynan Covid-19 anyqtaldy. Kenishtegi jumysshylar sany sol sátte 45 myń adam quraǵan edi. Indettiń aýa jaiylýyna jol bermeý úshin TShO basshylyǵy qatań karantin sharasyn qabyldap, ujymdy shuǵyl túrde evakýatsiialady.
Naýryz men mamyr aiynyń aralyǵynda munai men gaz igerýge tikelei qatysy joq 27 myń maman úilerine oraldy.
Jumystan ýaqytsha bosaǵan mamandar otbasynyń jalǵyz asyraýshy bolǵandyqtan kompaniia basshylyǵy olardy qaraýsyz qaldyrǵan joq.
"Bul jaǵdai jumys berýshi men munaishylardyń kinásinen oryn alǵan joq. Osy sebepti 1 shilde men 31 jeltoqsan aralyǵynda indettiń kesirinen jumystan qol úzgen mamandarǵa ortasha jalaqynyń 50 paiyzy tólenedi", – dedi TShO-nyń bas direktory Imer Bonner.
Munai-gaz salasynyń sarapshysy Oleg Chervinskiidiń pikirinshe, Teńizdegi jumys turalap qalsa, munyń saldary tutas ekonomikaǵa áser etedi.
"Kompaniiada eńbek etetin 27 myń munaishynyń tabysy tómendegeni óz aldyna, ekonomikanyń túrli salalary toqyraýǵa ushyrar edi. Teńizshevroil Qazaqstannyń munaiservis salasyndaǵy 200 myńǵa jýyq adam eńbek etetin 2 myńǵa tarta kompaniiamen qoiyn-qoltyqtasyp jumys isteidi. Osynaý kompaniialardyń 80 paiyz tapsyrysy TShO, Qarashyǵanaq konsortsiýmy men Qarashyǵanaq PetroliýmOpereiting kompaniialaryna tiesili", – deidi ol.
Onyń atap ótkenindei eger qazaqstandyq munaiservis naryǵyn salaǵa bóler bólsek, TShO-nyń qurylys-montaj jumysyndaǵy úlesi barsha tapsyrystyń 80 paiyzyn quraidy eken.
Teńiz jobasyn keńeitý barysynda kompaniia qazaqstandyq tasymaldaýshylardan 7,8 mlrd dollardyń ónimi men qyzmet túrin satyp alýdy josparlap otyr. Jobany 2020-2022 jyldary júzege asyrý kózdelgen. Bul óz kezeginde qazaqstandyq kompaniialardy ájeptáýir tabysqa kenelter edi.
Teńizdegi jumys toqtap qalǵannan keiin bankte qaryzy bar qazaqstandyq firmalar tyǵyryqqa tireldi.
"Qazir qalt-qult etip otyrmyz. Jyl aiaǵyna deiin jetemiz be, joq pa naqty aita almaimyn. Osy kúnge deiin TShO-men belsendi jumys istep kelgen kompaniialardyń kópshiligi bankrot bolýy múmkin", – dep málimdemegen bolatyn Qazaqstan munaiservis odaǵynyń tóraǵasy Ráshid Jaqsylyqov.
Odaq sarapshylarynyń esepteýinshe bul saladaǵy kompaniialardyń 50 paiyzy bankrotqa ushyraýy múmkin, tiisinshe júzdegen, myńdaǵan adamnyń jumyssyz qalýy qaýpi bar. Elimizdiń Batys óńirinde jumyssyzdyqtyń beleń alýy óńirdegi áleýmettik ahýaldy ýshyqtyryp jibereri anyq.
"Jumyssyz adam birden ákimdik pen Úkimet úiine tartady. Ádildikti sol aradan izdeidi", – degen bolatyn odaq basshysy.
Teńizdegi jumystyń qaita jandanýy Jaqsylyqovtyń boljamyn joqqa shyǵaryp, jaǵdaidyń jaqsararyna senim uialatady.
"Teńizshevroil" bas menedjeri Rzabek Artyǵalievtiń atap ótkenindei kompaniia indettiń ekinshi tolqynyna tolyqtai daiyn.
"Tamyzda 17 myńǵa tarta adam vahtalyq jumysqa tartyldy. Munaishylardy udaiy testileýden ótkizýdemiz. Jaǵdai qalypqa kelgennen keiin 40 myń adam Teńiz kenishine qaita shaqyrylyp, jumysqa kirisedi. Qysqartý bolmaidy", – deidi ol.
