QR Ulttyq Banki búgin valiýta naryǵyna qatysty aqparatpen bólisti. Ondaǵy derekke sáikes, qyrkúiektiń qorytyndysy boiynsha teńgege shaqqandaǵy 1 AQSh dollarynyń baǵamy 549,07 teńgege deiin artyp, ulttyq valiýta quny 1,9%-ǵa álsiredi. Qazaqstannyń qor birjasyndaǵy saýda-sattyqtyń ortasha bir kúndik kólemi bir aida 217 mln dollardan 248 mln AQSh dollarǵa deiin ulǵaidy. Jalpy saýda-sattyq kólemi 5,2 mlrd AQSh dollaryn qurady, dep habarlaidy Dalanews.kz.
"Qyrkúiekte Ulttyq qordan 500 mln AQSh dollaryna valiýta satyldy. Bul respýblikalyq biýdjetke transfertter bólýdi, sondai-aq "Taldyqorǵan-Úsharal" magistraldyq gaz qubyrynyń infraqurylymdyq jobasyn qarjylandyrýdy qamtamasyz etýge múmkindik berdi. Ulttyq qordan satý úlesi jalpy saýda-sattyq kóleminiń 9%-yn nemese bir kúnde shamamen 24 million AQSh dollaryn qurady", - deidi Ulttyq Bank.
Kútiletin fiskaldyq túsimderdi eskergende, Úkimettiń aldyn ala boljamdy ótinimderi boiynsha qazan aiynda respýblikalyq biýdjetten transfertter bólý úshin Ulttyq Bank Ulttyq qordan 600 mln AQSh dollarynan 700 mln AQSh dollaryna deiingi mólsherde valiýta satylady dep kútetini de naqtylanady.
"Buǵan deiin habarlanǵandai, Ulttyq Bank 2025 jyldyń basynan beri otandyq óndirýshilerden altyn satyp alý operatsiialaryn teńestire bastady. Qyrkúiekte 290 mlrd teńge alyndy. Sonymen qatar altyn baǵasynyń aitarlyqtai ósýi kezinde "shaǵylystyrý" aiasynda ótimdilikti alý kólemi altyn satyp alý operatsiialaryna bailanysty teńge emissiiasy kóleminen artta qalyp otyr. Osy jyldyń basynan beri jinaqtap alynbaǵan ótimdilikti eskere otyryp, shaǵylystyrý operatsiialary aiasynda IV toqsan ishinde 1,4 trln teńgege balama somada shetel valiýtasyn satý josparda bar. Ulttyq qor qarajatymen operatsiialar júrgizý kezinde, sondai-aq shaǵylystyrý tetigin iske asyrý kezinde Ulttyq Bank naryqtyq beitaraptyq qaǵidatyn saqtaidy, bul shetel valiýtasyn turaqty jáne birkelki satýdy bildiredi", delingen retteýshi habarlamasynda.
Ulttyq Bank qyrkúiek aiynda valiýtalyq interventsiia júrgizgen joq.
Kvazimemlekettik sektor sýbektileriniń valiýtalyq túsimniń bir bóligin mindetti satý normasy aiasynda ótken aidyń qorytyndysy boiynsha valiýtalyq túsimdi satý kólemi shamamen 378 mln AQSh dollaryn qurady.
BJZQ valiýta aktivteriniń úlesi osyǵan deiingi josparǵa sáikes shamamen 40% ekenin eskere otyryp, Ulttyq Bank qyrkúiekte zeinetaqy aktivteriniń investitsiialyq portfeline AQSh dollaryn satyp alǵan joq. Qazanda da valiýta satyp alý josparlanbaidy.
"Qysqamerzimdi perspektivada teńge baǵamynyń dinamikasy naryqqa qatysýshylardyń kútýine, toqsan saiynǵy salyq tólemderine, álemdik naryqtardaǵy ahýalǵa jáne geosaiasi ózgeristerge bailanysty bolady. Ulttyq Bank teńgerimsizdiktiń jinaqtalýyna jol bermeitin jáne altyn-valiýta rezervteriniń saqtalýyn qamtamasyz etetin ikemdi baǵam belgileý rejimin ustanady", - deidi ortalyq bank bolashaqtaǵy teńge baǵamyna qatysty kózqarasynda.
Buǵan deiin dollar qymbattap, psihologiialyq shekti igergenin jazǵanbyz. Al sarapshylar teńgeniń shamadan tys álsireýi importtyq taýarlardyń qunyna teris áser etýi jáne infliatsiialyq protsesterdiń artýyna ákelip soǵýy múmkin ekenin boljaidy.
