ق ر ۇلتتىق بانكى بۇگىن ۆاليۋتا نارىعىنا قاتىستى اقپاراتپەن ءبولىستى. ونداعى دەرەككە سايكەس، قىركۇيەكتىڭ قورىتىندىسى بويىنشا تەڭگەگە شاققانداعى 1 اقش دوللارىنىڭ باعامى 549،07 تەڭگەگە دەيىن ارتىپ، ۇلتتىق ۆاليۋتا قۇنى 1،9%-عا السىرەدى. قازاقستاننىڭ قور بيرجاسىنداعى ساۋدا-ساتتىقتىڭ ورتاشا ءبىر كۇندىك كولەمى ءبىر ايدا 217 ملن دوللاردان 248 ملن اقش دوللارعا دەيىن ۇلعايدى. جالپى ساۋدا-ساتتىق كولەمى 5،2 ملرد اقش دوللارىن قۇرادى، دەپ حابارلايدى Dalanews.kz.
"قىركۇيەكتە ۇلتتىق قوردان 500 ملن اقش دوللارىنا ۆاليۋتا ساتىلدى. بۇل رەسپۋبليكالىق بيۋدجەتكە ترانسفەرتتەر ءبولۋدى، سونداي-اق "ءتالدىقورعان-ۇشارال" ماگيسترالدىق گاز قۇبىرىنىڭ ينفراقۇرىلىمدىق جوباسىن قارجىلاندىرۋدى قامتاماسىز ەتۋگە مۇمكىندىك بەردى. ۇلتتىق قوردان ساتۋ ۇلەسى جالپى ساۋدا-ساتتىق كولەمىنىڭ 9%-ىن نەمەسە ءبىر كۇندە شامامەن 24 ميلليون اقش دوللارىن قۇرادى"، - دەيدى ۇلتتىق بانك.
كۇتىلەتىن فيسكالدىق تۇسىمدەردى ەسكەرگەندە، ۇكىمەتتىڭ الدىن الا بولجامدى وتىنىمدەرى بويىنشا قازان ايىندا رەسپۋبليكالىق بيۋدجەتتەن ترانسفەرتتەر ءبولۋ ءۇشىن ۇلتتىق بانك ۇلتتىق قوردان 600 ملن اقش دوللارىنان 700 ملن اقش دوللارىنا دەيىنگى مولشەردە ۆاليۋتا ساتىلادى دەپ كۇتەتىنى دە ناقتىلانادى.
"بۇعان دەيىن حابارلانعانداي، ۇلتتىق بانك 2025 جىلدىڭ باسىنان بەرى وتاندىق وندىرۋشىلەردەن التىن ساتىپ الۋ وپەراسيالارىن تەڭەستىرە باستادى. قىركۇيەكتە 290 ملرد تەڭگە الىندى. سونىمەن قاتار التىن باعاسىنىڭ ايتارلىقتاي ءوسۋى كەزىندە "شاعىلىستىرۋ" اياسىندا وتىمدىلىكتى الۋ كولەمى التىن ساتىپ الۋ وپەراسيالارىنا بايلانىستى تەڭگە ەميسسياسى كولەمىنەن ارتتا قالىپ وتىر. وسى جىلدىڭ باسىنان بەرى جيناقتاپ الىنباعان وتىمدىلىكتى ەسكەرە وتىرىپ، شاعىلىستىرۋ وپەراسيالارى اياسىندا IV توقسان ىشىندە 1،4 ترلن تەڭگەگە بالاما سومادا شەتەل ۆاليۋتاسىن ساتۋ جوسپاردا بار. ۇلتتىق قور قاراجاتىمەن وپەراسيالار جۇرگىزۋ كەزىندە، سونداي-اق شاعىلىستىرۋ تەتىگىن ىسكە اسىرۋ كەزىندە ۇلتتىق بانك نارىقتىق بەيتاراپتىق قاعيداتىن ساقتايدى، بۇل شەتەل ۆاليۋتاسىن تۇراقتى جانە بىركەلكى ساتۋدى بىلدىرەدى"، دەلىنگەن رەتتەۋشى حابارلاماسىندا.
ۇلتتىق بانك قىركۇيەك ايىندا ۆاليۋتالىق ينتەرۆەنسيا جۇرگىزگەن جوق.
كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمنىڭ ءبىر بولىگىن مىندەتتى ساتۋ نورماسى اياسىندا وتكەن ايدىڭ قورىتىندىسى بويىنشا ۆاليۋتالىق ءتۇسىمدى ساتۋ كولەمى شامامەن 378 ملن اقش دوللارىن قۇرادى.
بجزق ۆاليۋتا اكتيۆتەرىنىڭ ۇلەسى وسىعان دەيىنگى جوسپارعا سايكەس شامامەن 40% ەكەنىن ەسكەرە وتىرىپ، ۇلتتىق بانك قىركۇيەكتە زەينەتاقى اكتيۆتەرىنىڭ ينۆەستيسيالىق پورتفەلىنە اقش دوللارىن ساتىپ العان جوق. قازاندا دا ۆاليۋتا ساتىپ الۋ جوسپارلانبايدى.
"قىسقامەرزىمدى پەرسپەكتيۆادا تەڭگە باعامىنىڭ ديناميكاسى نارىققا قاتىسۋشىلاردىڭ كۇتۋىنە، توقسان سايىنعى سالىق تولەمدەرىنە، الەمدىك نارىقتارداعى احۋالعا جانە گەوساياسي وزگەرىستەرگە بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىنا جول بەرمەيتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجيمىن ۇستانادى"، - دەيدى ورتالىق بانك بولاشاقتاعى تەڭگە باعامىنا قاتىستى كوزقاراسىندا.
بۇعان دەيىن دوللار قىمباتتاپ، پسيحولوگيالىق شەكتى يگەرگەنىن جازعانبىز. ال ساراپشىلار تەڭگەنىڭ شامادان تىس السىرەۋى يمپورتتىق تاۋارلاردىڭ قۇنىنا تەرىس اسەر ەتۋى جانە ينفلياسيالىق پروسەستەردىڭ ارتۋىنا اكەلىپ سوعۋى مۇمكىن ەكەنىن بولجايدى.
