Qazaqstan qor birjasynda 24 sáýirde kúndizgi saýda-sattyq qorytyndysy boiynsha 1 AQSh dollarynyń ortasha belgilengen baǵamy 517,16 teńge bolyp, bir táýlikte 1,22 teńgege arzandady. Ótken aptanyń sońynda ǵana quny 521 teńge bolǵan amerikalyq valiýta osy aptadan bastap qunsyzdanýǵa kóshken. Onyń sebebi nede? Bul saýalǵa jaýapty Dalanews.kz saitynan oqi otyryńyzdar.
Qazaqstan qarjygerleri qaýymdastyǵy teńgeniń nyǵaiýyna túrtki birneshe faktordy atady.
"QR Ulttyq Banki, eksporttaýshylar men kvazimemlekettik sektor sýbektileri tarapynan shetel valiýtasy túrindegi turaqty usynystyń valiýta naryǵyndaǵy jaǵdaiǵa yqpal etýi múmkin. Sondai-aq naryqqa qatysýshy jekelegen tulǵalardyń shetel valiýtasyna degen suranysty ishinara qanaǵattandyrýy da qoldaý kórsetken bolýy kerek. Syrtqy faktorlardyń ishinde aptanyń basynda teńgege shaqqanda nyǵaia túsken reseilik rýbl, AQSh-tyń Iran munaiyna qarsy engizbek jańa sanktsiialary aiasynda munai baǵasynyń ósimi, sondai-aq investorlardyń amerikalyq aktivterden jahandyq deńgeide jappai arylýǵa tyrysýy dollardyń quldyraýyna qoldaý kórsetti", delingen qaýymdastyq túsiniktemesinde.
Al sársenbi kúni teńgeniń azdap qunyn joǵaltýyna biýdjet qarajatyn igerýdi jedeldetý, sondai-aq syrtqy boryshqa qyzmet kórsetý qajettiligi aiasynda importtyq kelisimsharttar boiynsha esep aiyrysýlardyń ulǵaiýy túrtki bolýy yqtimal. Sondai-aq, aqsha baǵamyna Resei rýbli pozitsiiasynyń nasharlaýy jáne Qytai men AQSh arasyndaǵy geosaiasi shielenistiń jalǵasýy teris áser etti. Máselen, Resei Bankiniń resmi málimetterine sáikes, 24 sáýirde 1 AQSh dollarynyń baǵamy 82,36 rýbl deńgeiinde belgilendi. Bir kún buryn bul baǵa 80,75 rýbl bolǵan edi.
Dalanews.kz saityna pikir bildirgen sarapshylar 1 AQSh dollarynyń baǵamy aldaǵy kúnderi 517-530 teńge aralyǵynda bolady dep topshylaidy, al jyl sońyna qarai qazir arzandap jatqan amerikalyq valiýta qaita kúshine enetini boljanady.
