Túrkistan oblysynda 2 millionnan astam halyq turady. Aýa raiy jylynǵan saiyn óńirge keletin týrister men taýda demalýshylardyń sany artady. Statistikalyq derekterge súiensek, jyl saiyn oblysqa keletin týrister men demalýshylardyń sany 1 mln adamǵa jetedi. Onyń ishinde taý bókterine baratyndardyń basym bóligi óńirdegi eń ásem tabiǵatymen erekshelenetin Sairam-Ógem memlekettik ulttyq tabiǵi parkinde tynyǵady.
Alaida taýda qaýipsizdik erejelerin saqtamaǵan alpinister qiyn jaǵdaiǵa tap bolady. Mundai kezde olarǵa kómekke Túrkistan oblysynyń Tótenshe jaǵdailar departamentiniń Leńgir qalasynda, Tólebi aýdanynda ornalasqan Jedel-qutqarý jasaǵy shyǵady. Qazirgi ýaqytta jasaqtyń shtattyq sany – 42 adam, onyń ishinde 34-i qutqarýshy, 4-i sý qutqarýshysy, 4-i kinologiialyq eseptegi mamandar. Resmi málimet boiynsha sońǵy 5 jylda oblystyń taýly aimaqtarynda barlyǵy 37 izdestirý-qutqarý jumystary júrgizilgen. Sonyń nátijesinde 128 adam qutqarylyp, 11 adamnyń máiiti tabylǵan.
Qaiǵyly jaǵdailardyń aldyn alý maqsatynda Túrkistan oblysynyń Tótenshe jaǵdailar departamenti taýǵa shyqqysy keletin demalýshylarǵa aldaǵy ýaqytta qajetti nusqaýlyqtar beredi:
Taýly aimaqtaǵy baqylaý-ótkizý pýnktteri bolǵan jaǵdaida mindetti túrde tirkelý;
Barǵan aýmaqtyń marshrýttyq kartasyn ózimen birge alyp júrý;
Erekshe qorǵalatyn tabiǵi aýmaqtarǵa barǵanda uiymdastyrýshylardyń nemese gidterdiń bastamasymen birge júrý;
Taýly betkeilerde tek arnaiy belgilengen marshrýttarmen júrý;
Ózderińizben jetkilikti mólsherde sý men kompas alý;
Beitanys marshrýtpen eshqashan jol bastaýshysyz taýǵa shyqpaý;
Qysta taýda qar kóshkininen, jazda qulap ketetin tastardan saq bolý;
Eger taýǵa birneshe kúnge shyqsańyz, táýlik boiy jumys isteitin 112 qutqarý qyzmetine qońyraý shalýdy umytpańyz.
Túrkistan oblysynyń Óńirlik kommýnikatsiialar qyzmeti
