Keńes Odaǵy Batyrynyń uly Anatolii Biriýkov bir kezderi Máskeý men Chehov qalalarynyń turǵyndaryn úreide ustaǵan qylmysker retinde tarihta qaldy. Keiin "balalar ańshysy" degen laqap atqa ie bolǵan ol qysqa ýaqyt ishinde birneshe sábidiń ómirin qiǵan. Qylmyskerdi izdeýge Máskeý politsiiasynyń úlken kúshi jumyldyryldy. Al onyń ustalǵany general-leitenant, Keńes Odaǵynyń Batyry Nikolai Biriýkov úshin aýyr soqqy boldy, dep habarlaidy dalanews.kz.
Anatolii Biriýkov 1939 jyly Máskeý oblysyndaǵy Chehov qalasynda dúniege kelgen. Onyń ákesi Nikolai Biriýkov Uly Otan soǵysynyń ardageri, general-leitenant ári Keńes Odaǵynyń Batyry bolǵan. Ol ulyn qatal tártippen tárbielep, bolashaǵynan úlken úmit kútken.
Alaida Anatoliidiń balalyq shaǵynda bolǵan bir oqiǵa onyń taǵdyryna qatty áser etti. Segiz jasynda ákesiniń patrondaryn bólshektemek bolǵan kezde jarylys bolyp, bala aýyr jaraqat alady. Sol jaraqattan keiin onyń betinde ómir boiy ketpeitin tyrtyq qalady. Keiin ol bul tyrtyqty adamdarǵa qainaǵan sýǵa kúiip qalǵanynan dep túsindirip júrgen.
Osy oqiǵadan keiin ainalasyndaǵylardyń mazaǵy kóbeiip, Anatolii tuiyq bola bastaidy. Adamdarmen aralasýdan qashqaqtap, óz álemine jabylady. Soǵan qaramastan mektepte jaqsy oqyp, muǵalimderiniń maqtaýyna ie bolǵan. Keiin ákesiniń áskeri jolyn jalǵastyrmai, slesar mamandyǵyn tańdaǵan. Qurylys salasynda eńbek etip, otbasyn quryp, eki qyzdyń ákesi atanǵan.
Biriýkovtyń balalarǵa qatysty qaýipti áreketteri 1971 jyly baiqala bastaǵan. Sol kezde ol balalar emhanasynyń janynda turǵan arbamen birge sábidi alyp ketýge árekettengen. Anasy der kezinde baiqap, kómek suraǵannan keiin er adam ustalady. Alaida ol bul áreketin "qaraýsyz qalǵan balaǵa sabaq bolsyn dep jasadym" dep túsindirgen. Politseiler onyń sózine senip, bosatyp jiberedi.
Bir jyldan keiin ol taǵy da balany urlamaq bolǵan kezde qolǵa túsken. Kei derekterde onyń úsh jylǵa sottalǵany aitylsa, basqa málimetterde jazadan qutylyp ketkeni kórsetiledi. Osy oqiǵadan keiin áieli onymen ajyrasyp ketken.
1977 jyldyń kúzinde Máskeýde jantúrshigerlik qylmystar tizbegi bastaldy. Alǵashqy qurbandardyń biri úsh ailyq sábi boldy. Qylmysker balany qaraýsyz turǵan arbadan alyp ketip, keiin ony óltirip tastaǵan.
Araǵa birneshe kún salyp taǵy bir sábi joǵaldy. Bir aidan keiin onyń denesi tabyldy. Tergeýshiler eki oqiǵanyń da bir adamnyń qolymen jasalǵanyn túsingenimen, naqty kúdiktini birden anyqtai almady.
Keiin taǵy bir bala urlanyp, kóp uzamai óli kúiinde tabyldy. Osydan keiin Máskeýde ata-analar balalaryn qaraýsyz qaldyrýdan qorqyp, qala turǵyndary arasynda úrei kúsheidi.
Politsiia kúdiktiniń fotorobotyn jasap, izdeý jumystaryn kúsheitti. Muny sezgen Biriýkov qylmystaryn týǵan jeri Chehovta jalǵastyrýǵa tyrysqan. Onda da eki sábi joǵalyp, keiin óli kúiinde tabylǵan.
1977 jyldyń 21 qazanynda ol taǵy bir balany alyp qashpaq bolǵan kezde anasy baiqap qalyp, aiǵai kóteredi. Qýǵynnan qutylý úshin Biriýkov sábidi jerge tastap, qashyp ketedi. Abyroi bolǵanda, bala aman qalǵan. Al kýágerler qylmyskerdiń túrin anyq kórip úlgergen.
Osy oqiǵadan keiin jasalǵan fotorobot tergeýshilerdi naqty kúdiktige alyp keldi. Kóp uzamai politsiia Biriýkov jumys isteitin qurylys mekemesine baryp, onyń jeke basyn anyqtady. Qylmysker sol kúni óz úiinde ustaldy.
Tergeý kezinde Anatolii Biriýkov bes sábidi óltirgenin moiyndaǵan. Ol jasaǵan qylmystaryn egjei-tegjeili aityp bergen.
Alǵashynda Biriýkov ákesi ózin qutqaryp qalady dep sengen. Nikolai Biriýkov ta bastapqyda ulynyń mundai aýyr qylmysqa barǵanyna sengisi kelmei, oǵan tájiribeli advokat jaldaǵan. Biraq sot barysynda dálelder tolyq rastalǵannan keiin general kópshilik aldynda ulynan bas tartty.
Sot-psihiatriialyq saraptama Anatolii Biriýkovty esi durys dep tanydy. Sot ony ólim jazasyna kesti. Qylmysker birneshe ret óz-ózine qol jumsamaq bolǵanymen, áreketteri sátsiz aiaqtalǵan. Keiin túrli organdarǵa keshirim surap ótinish jazǵan, biraq bári qanaǵattandyrylmady.
Anatolii Biriýkov 1979 jyldyń 24 aqpanynda atyldy. Ol 40 jasqa tolǵannan keiin kóp uzamai ólim jazasyna kesilgen.
