Almatylyq "Qairat" fýtbol klýbynyń burynǵy kapitany ári shabýylshysy Sergei Rojkov ómirden ótti. Ol 84 jasta edi, dep habarlaidy dalanews.kz.
Sergei Rojkovtyń qaitys bolǵany týraly aqparat fýtbol klýbynyń Instagram paraqshasynda jariialandy.
"84 jasqa qaraǵan shaǵynda qazaqstandyq fýtbol ardageri, "Qairattyń" burynǵy shabýylshysy Sergei Rojkov dúnieden ótti. Sergei Egorovich "Qairat" sapynda 1966-1967, 1970-1973 jáne 1975-1976 jyldary óner kórsetti. Almatylyq klýb quramynda ol 203 match ótkizip, 25 gol soqty. Komanda kapitany boldy jáne óz býynynyń eń jarqyn ókilderiniń biri retinde este qaldy", – delingen klýb habarlamasynda.
Sondai-aq 1971 jyly Sergei Rojkov "Qairatpen" birge Temirjolshylardyń halyqaralyq sport odaǵy kýbogynyń iegeri atanǵany aityldy.
Ol KSRO sport sheberi, 1969 jylǵy KSRO chempiony, KSRO kýbogynyń eki dúrkin iegeri bolǵan. Sonymen qatar KSRO quramasy sapynda bir match ótkizgen.
"Sergei Egorovich klýbymyzdyń jáne Qazaqstan fýtbolynyń tarihynda eleýli iz qaldyrdy. "Qairat" fýtbol klýby Sergei Egorovichtiń týǵan-týystaryna, jaqyndaryna, dostaryna, burynǵy komandalastaryna jáne ony tanyǵan barsha janǵa qaiǵyra kóńil aitady", – dep habarlady almatylyq klýbtyń baspasóz qyzmeti.
