Tatarstan Respýblikasynda tańerteń jasalǵan dron shabýyly saldarynan 12 adam qaza taýyp, 39 adam jaraqat aldy. Bul týraly respýblika basshysy Rýstam Minnihanovtyń baspasóz qyzmeti habarlady, dep habarlaidy dalanews.kz.
Resmi málimet boiynsha, jappai shabýylǵa Nijnekamsk qalasy ushyraǵan, dep jazady "Agentsvo.Novosti". Bilik ókilderiniń aitýynsha, óndiristik nysandarmen qatar azamattyq infraqurylym da zardap shekken. Osyǵan bailanysty Tatarstanda aza tutý kúni jariialandy.
Aldyn ala málimetterge sáikes, shabýyl kezinde Eýropadaǵy eń iri munai-himiia keshenderiniń biri sanalatyn «Nijnekamskneftehim» kásiporny nysanaǵa alynǵan. Kásiporyn SIBÝR holdinginiń quramyna kiredi. Keibir ýkrainalyq monitoringtik arnalar kásiporyndaǵy órttiń videosyn jariialady. Atalǵan ónerkásiptik aimaqta «TANEKO» munai óńdeý zaýyty men «TAIF-NK» kesheni de ornalasqan.
Bul – Reseidiń halyqaralyq deńgeide moiyndalǵan aýmaǵyndaǵy óńirlerge jasalǵan shabýyldar arasynda adam shyǵyny eń kóp oqiǵalardyń biri. Buǵan deiin mundai kólemdegi shyǵyn Belgorod oblysynda tirkelgen edi. 2023 jyldyń 30 jeltoqsanynda Belgorodtaǵy zymyrandyq shabýyl saldarynan 25 adam qaza taýyp, 100-den astam adam jaralanǵan. Al 2024 jylǵy 12 mamyrda kópqabatty turǵyn úige zymyran qulap, 17 adam kóz jumǵan bolatyn.
Resei Qorǵanys ministrliginiń málimetinshe, dúisenbige qaraǵan túni Resei óńirleri men Qyrym aýmaǵyna barlyǵy 456 ýkrainalyq dron shabýyl jasaǵan.
Al Ýkraina Áýe kúshteri Resei áskeriniń tún ishinde Ýkraina aýmaǵyna 130 dron ushyrǵanyn habarlady. Sýmy qalasyna jasalǵan shabýyldan keminde 10 adam zardap shekken. Sońǵy kúnderi Resei men Ýkraina arasyndaǵy ózara áýe shabýyldary kúsheiip, eki tarap ta drondar men zymyrandardy keńinen qoldana bastaǵany baiqalady.
