تاتارستان رەسپۋبليكاسىندا تاڭەرتەڭ جاسالعان درون شابۋىلى سالدارىنان 12 ادام قازا تاۋىپ, 39 ادام جاراقات الدى. بۇل تۋرالى رەسپۋبليكا باسشىسى رۋستام ميننيحانوۆتىڭ باسپاسٶز قىزمەتٸ حابارلادى, دەپ حابارلايدى dalanews.kz.
رەسمي مەلٸمەت بويىنشا, جاپپاي شابۋىلعا نيجنەكامسك قالاسى ۇشىراعان, دەپ جازادى "اگەنتسۆو.نوۆوستي". بيلٸك ٶكٸلدەرٸنٸڭ ايتۋىنشا, ٶندٸرٸستٸك نىساندارمەن قاتار ازاماتتىق ينفراقۇرىلىم دا زارداپ شەككەن. وسىعان بايلانىستى تاتارستاندا ازا تۇتۋ كٷنٸ جارييالاندى.
الدىن الا مەلٸمەتتەرگە سەيكەس, شابۋىل كەزٸندە ەۋروپاداعى ەڭ ٸرٸ مۇناي-حيمييا كەشەندەرٸنٸڭ بٸرٸ سانالاتىن «نيجنەكامسكنەفتەحيم» كەسٸپورنى نىساناعا الىنعان. كەسٸپورىن سيبۋر حولدينگٸنٸڭ قۇرامىنا كٸرەدٸ. كەيبٸر ۋكراينالىق مونيتورينگتٸك ارنالار كەسٸپورىنداعى ٶرتتٸڭ ۆيدەوسىن جارييالادى. اتالعان ٶنەركەسٸپتٸك ايماقتا «تانەكو» مۇناي ٶڭدەۋ زاۋىتى مەن «تايف-نك» كەشەنٸ دە ورنالاسقان.
بۇل – رەسەيدٸڭ حالىقارالىق دەڭگەيدە مويىندالعان اۋماعىنداعى ٶڭٸرلەرگە جاسالعان شابۋىلدار اراسىندا ادام شىعىنى ەڭ كٶپ وقيعالاردىڭ بٸرٸ. بۇعان دەيٸن مۇنداي كٶلەمدەگٸ شىعىن بەلگورود وبلىسىندا تٸركەلگەن ەدٸ. 2023 جىلدىڭ 30 جەلتوقسانىندا بەلگورودتاعى زىمىراندىق شابۋىل سالدارىنان 25 ادام قازا تاۋىپ, 100-دەن استام ادام جارالانعان. ال 2024 جىلعى 12 مامىردا كٶپقاباتتى تۇرعىن ٷيگە زىمىران قۇلاپ, 17 ادام كٶز جۇمعان بولاتىن.
رەسەي قورعانىس مينيسترلٸگٸنٸڭ مەلٸمەتٸنشە, دٷيسەنبٸگە قاراعان تٷنٸ رەسەي ٶڭٸرلەرٸ مەن قىرىم اۋماعىنا بارلىعى 456 ۋكراينالىق درون شابۋىل جاساعان.
ال ۋكراينا ەۋە كٷشتەرٸ رەسەي ەسكەرٸنٸڭ تٷن ٸشٸندە ۋكراينا اۋماعىنا 130 درون ۇشىرعانىن حابارلادى. سۋمى قالاسىنا جاسالعان شابۋىلدان كەمٸندە 10 ادام زارداپ شەككەن. سوڭعى كٷندەرٸ رەسەي مەن ۋكراينا اراسىنداعى ٶزارا ەۋە شابۋىلدارى كٷشەيٸپ, ەكٸ تاراپ تا دروندار مەن زىمىرانداردى كەڭٸنەن قولدانا باستاعانى بايقالادى.
