– Ardaqty otandastar! Bul jyl memleketimiz úshin erekshe qiyn jyl boldy. Táýelsizdik alǵaly beri alǵash ret elimiz eń basty, eń izgi qundylyqtaryn joǵaltýǵa shaq qaldy.
Tarih kýá, mundai jaǵdaidan keiin kóp elder óz ózine kele almai, ondaǵan jyldarǵa turalap qalady. Biraq osyǵan qaramastan bizdiń halyq, aýyrlyqqa maiyspaityn erik-jigeri men qaranardai qaiyspaityn kúshin kórsetip, tórtkúl dúniege óziniń órkenietti ómirge degen haqyn pash etti.
Keshegi alasapyranda ortaq úiimizdegi bereke men tynyshtyq ta halqymyzdyń osynaý danalyǵy men birliginiń arqasynda, daralyǵy men iriliginiń arqasynda saqtaldy. Elimiz úshin sol bir syndarly saǵattarda Prezident Q.Toqaevtyń memlekettiń ydyraýyna jol bermei, tizgindi nyq ustap otyrǵanyna barshamyz kýá boldyq. Sóz joq, bul ult aldyndaǵy, urpaq aldyndaǵy orasan zor jaýapkershilik.
Árine, dál qazir árbir azamatymyz úshin eń mańyzdy másele ne? Qarapaiym, biraq óte qajet úsh nárse bar. Ol – erteńgi kúnge degen senimi, bala-shaǵasynyń amandyǵy, ózin beiqam sezinýi. Bul – qundylyqtardyń qadiri, ásirese, ainaladaǵy qarýly qaqtyǵystar men mán-maǵynasyz qantógisterdi kórgende erekshe bilinedi.
Mine, osyndai almaǵaiyp ýaqytta el tizginin sanasyna tabiǵattyń ózi darytqan geosaiasi kóregendigi, týǵan halqynyń múddesin biik qoia alatyn diplomatiialyq oi-órisi bar qairatker, eń bastysy – memlekettiń taǵdyry úshin jaýapkershilikten taisalmai, tik kóteretin tulǵa ustaý kerek. Óz basym bul qasietterdiń barlyǵyn Qasym-Jomart Kemeluly Toqaevtyń boiynan kóremin.
Sondyqtan, búgingidei el-jurtymyz úshin syndarly ýaqytta men Qasym-Jomart Kemelulyn aldaǵy úlken saiasi naýqan – Qazaqstan Respýblikasy Prezidentin sailaýda qoldaýǵa shaqyramyn.
Azamattarymyz týǵan el aldyndaǵy jaýapkershiligin sezinip, jumylǵan judyryqtai aýyzbirshiligin tanytyp, durys tańdaý jasaidy dep úmittenemin.
Tuiyq joldan adastyrmai alyp shyǵatyn da, qaratúnek qiyndyqty jaryp shyǵatyn da – birlik! Osyny umytpaiyq, aǵaiyn!
Imanǵali TASMAǴAMBETOV
