– ارداقتى وتانداستار! بۇل جىل مەملەكەتىمىز ءۇشىن ەرەكشە قيىن جىل بولدى. تاۋەلسىزدىك العالى بەرى العاش رەت ەلىمىز ەڭ باستى، ەڭ ىزگى قۇندىلىقتارىن جوعالتۋعا شاق قالدى.
تاريح كۋا، مۇنداي جاعدايدان كەيىن كوپ ەلدەر ءوز وزىنە كەلە الماي، ونداعان جىلدارعا تۇرالاپ قالادى. ءبىراق وسىعان قاراماستان ءبىزدىڭ حالىق، اۋىرلىققا مايىسپايتىن ەرىك-جىگەرى مەن قارانارداي قايىسپايتىن كۇشىن كورسەتىپ، تورتكۇل دۇنيەگە ءوزىنىڭ وركەنيەتتى ومىرگە دەگەن حاقىن پاش ەتتى.
كەشەگى الاساپىراندا ورتاق ۇيىمىزدەگى بەرەكە مەن تىنىشتىق تا حالقىمىزدىڭ وسىناۋ دانالىعى مەن بىرلىگىنىڭ ارقاسىندا، دارالىعى مەن ىرىلىگىنىڭ ارقاسىندا ساقتالدى. ەلىمىز ءۇشىن سول ءبىر سىندارلى ساعاتتاردا پرەزيدەنت ق.توقايەۆتىڭ مەملەكەتتىڭ ىدىراۋىنا جول بەرمەي، تىزگىندى نىق ۇستاپ وتىرعانىنا بارشامىز كۋا بولدىق. ءسوز جوق، بۇل ۇلت الدىنداعى، ۇرپاق الدىنداعى وراسان زور جاۋاپكەرشىلىك.
ارينە، ءدال ءقازىر ءاربىر ازاماتىمىز ءۇشىن ەڭ ماڭىزدى ماسەلە نە؟ قاراپايىم، ءبىراق وتە قاجەت ءۇش نارسە بار. ول – ەرتەڭگى كۇنگە دەگەن سەنىمى، بالا-شاعاسىنىڭ اماندىعى، ءوزىن بەيقام سەزىنۋى. بۇل – قۇندىلىقتاردىڭ ءقادىرى، اسىرەسە، اينالاداعى قارۋلى قاقتىعىستار مەن ءمان-ماعىناسىز قانتوگىستەردى كورگەندە ەرەكشە بىلىنەدى.
مىنە، وسىنداي الماعايىپ ۋاقىتتا ەل تىزگىنىن ساناسىنا تابيعاتتىڭ ءوزى دارىتقان گەوساياسي كورەگەندىگى، تۋعان حالقىنىڭ مۇددەسىن بيىك قويا الاتىن ديپلوماتيالىق ءوي-ورىسى بار قايراتكەر، ەڭ باستىسى – مەملەكەتتىڭ تاعدىرى ءۇشىن جاۋاپكەرشىلىكتەن تايسالماي، تىك كوتەرەتىن تۇلعا ۇستاۋ كەرەك. ءوز باسىم بۇل قاسيەتتەردىڭ بارلىعىن قاسىم-جومارت كەمەل ۇلى توقايەۆتىڭ بويىنان كورەمىن.
سوندىقتان، بۇگىنگىدەي ەل-جۇرتىمىز ءۇشىن سىندارلى ۋاقىتتا مەن قاسىم-جومارت كەمەلۇلىن الداعى ۇلكەن ساياسي ناۋقان – قازاقستان رەسپۋبليكاسى پرەزيدەنتىن سايلاۋدا قولداۋعا شاقىرامىن.
ازاماتتارىمىز تۋعان ەل الدىنداعى جاۋاپكەرشىلىگىن سەزىنىپ، جۇمىلعان جۇدىرىقتاي اۋىزبىرشىلىگىن تانىتىپ، دۇرىس تاڭداۋ جاسايدى دەپ ۇمىتتەنەمىن.
تۇيىق جولدان اداستىرماي الىپ شىعاتىن دا، قاراتۇنەك قيىندىقتى جارىپ شىعاتىن دا – بىرلىك! وسىنى ۇمىتپايىق، اعايىن!
يمانعالي تاسماعامبەتوۆ
