Eldik maqsat-muratty joǵary qoiǵan abzal azamattyń 20-naýryz kúni 100 jyldyq mereitoiy syrǵyp óte shyqty. Ásheiinde aitýly datalardy tizbelep, toi ótkizýde joǵaryǵa usynys jasaǵysh depýtattardyń da únsiz qalǵanyn túsine almadyq. Qazaqy tamyrdan qol úzgen, ótkeninen beihabar atqarýshy biliktegi saiypqyran ministrler men komitet tóraǵalarynan mundai usynys kútpeimiz. Biraq qos shatyrly parlamenttegi depýtattardyń bári bolmasa da teń jartysy Jumabek Táshenovty jaqsy biletinine bás tigemiz. Ásheiinde toi-tomalaqta Táshenov jaiynda áńgime qozǵasań aýyzdyǵa sóz, aiaqtyǵa jol bermeitin aǵalarymyz qalaisha 100 jyldyqty esten shyǵaryp aldy?
Májilis spikeri Qabibolla Jaqypovtyń, Qýanysh Sultanovtyń, Orazkúl Asanǵazynyń, Ýálihan Bishimbaevtyń, Kamal Burhanovtyń, Baqytjan Ertaevtyń, Quttyqoja Ydyrysovtyń Táshenovty jaqsy biletinin bilemiz. Bul úshin ol kisilerge suraý salyp jatýdyń ózi uiat. Al Senatta otyrǵan qasqalarǵa Táshenovtyń kim ekenin aityp táptishtep jatýdyń ózi artyq.
Bilmegender – bilip alsyn. J.Táshenov respýblikanyń saiasi, ekonomikalyq, mádeni damýyna basshylyq jasaǵan jyldary qazaq memleketiniń aýmaq tutastyǵynyń saqtalýyna kóp eńbek sińirdi. Mańǵystaýdy Túrikmenstanǵa qosý jónindegi usynystarǵa toitarys berdi. Tyń ólkesine biriktirilgen soltústik oblystardy Reseige, Ońtústik Qazaqstannyń maqta egetin aýdandaryn Ózbekstanǵa berýge qarsy shyqty. Qazaqstan jerinde iadrolyq jarylystar jasaýǵa qarsylyq bildirdi. Shyǵarmashylyq odaqtar ókilderine úi-páter bergendigi úshin Almatynyń ortasynda «qazaq aýylyn» qurdy dep aiyptaldy. «Qazaq ádebieti» gazetin jabýdan, «Sotsialistik Qazaqstan» gazetin «Kazpravdanyń» aýdarmasy etip shyǵarylý qaýpinen qorǵap qaldy.
Qazaq eli úshin taý qoparyp, tas jarýǵa daiar turatyn mundai tulǵany qalaisha umytýǵa bolady? Bireýler «mynadai daǵdarys kezeńinde toi toilaý neńdi alǵan» dep kúlýi múmkin. Iá, qazir toi toilaityn kez emes. Biraq sanaly ǵumyryn elge qyzmet etýge arnaǵan J.Táshenovtei azamatty eske alǵan ǵibartty toi dúnieniń kez kelgen daǵdarysyna qarsy turatyndai kúsh beretinin umytpaýymyz kerek. Eger J.Táshenovtyń 100 jyldyq mereitoiy atalyp ótkende, oraiy kelgende áńgime aitýǵa daiar turatyn depýtattarymyz jer-jerde dúiim jurttyń aldynda asyl azamattardyń erlik isteri jaiynda et júregi ezilip áńgime aitar edi ǵoi. Qalai desek te, J.Táshenovtyń mereitoiy ol memlekettiń mereiin ósirip, ultty uiystyratyn aitýly kún ekeni anyq. Barsha qazaq balasyna rýh syilaityn kúndi qalaisha umyt qaldyrdyq aǵaiyn!
«Qala men Dala» gazeti
