Áldekimder «Bárimiz Keńes zamanynda áskerge baryp, otan aldyndaǵy boryshymyzdy ótedik. Merekemen quttyqtaǵanda turǵan ne bar eken?» dep óz oilaryn aitty. Olarǵa bul merekeniń Táýelsiz Qazaqstanǵa eshqandaida qatysy joq ekenin aitqanymyzda, ashy sýdy jutyp alǵan aǵalarymyz «Men ólgenshe osy merekeni toilaimyn!» dep ashýǵa býlyqqanyn kórgende ne jylarymyzdy, ne kúlerimizdi bilmedik.
Eń soraqysy el-jurtqa tanymal keibir aǵalamarymyzdyń aýzynan da osyǵan uqsas sózder estidik. Uiat-aq.
Olardyń 23 aqpandy mereke retinde qabyldaýyna kezinde Keńes armiiasynyń qatyrynda áskeri boryshyn ótegenderi sebep bolypty. Al, orys tildi qazaqtar staqandaryn qaǵastyryp, 23 aqpan kúni telniashkalaryn kiip alyp, ishimdikke bas qoidy.
Budan neni baiqaýǵa bolady? Budan kóptegen azamattardyń áli kúnge deiin quldyq sanadan aryla almaǵanyn baiqaýǵa bolady.
23 aqpanda Keńester Odaǵynyń murageri Resei toilaityny belgili. Solarǵa birqatar Qazaqstan azamattary qosylyp, osy bir kúndi ataýsyz qaldyrǵan joq. Bóten eldiń merekesin toilaý bul – táýelsizdikke jasalǵan opasyzdyq emes pe? Bul rette «Merekede turǵan ne bar» degen sóz aqtaý bola almaidy.
Keńestik júieniń quramynda bolǵan Ýkraina, Belorýs, Ózbekstan, Grýziia, Ázirbaijan syndy elderdiń er-azamattar 23 aqpandy esterine de alǵan joq. Áitpese solar áskerge barmady deisiz ba?
23 aqpandy toi-tomalaq dese dalaqtap júre beretin baiaǵy qazaqtar ǵana toilady.
23 aqpandy mereke sanaityn er-azamattar osy jastar Áýlie Valentin kúnin toilaǵanda olarǵa aqyl aityp, áleýmettik jelide bir-birinen asyryp post jazatynyn bárimiz bilemiz.
Osy aqylman aǵailardyń kelmeske ketken Keńes armiiasynyń merekesin toilaǵanyn jastarǵa qalai túsindirýge bolady?
Ádette búkil adamzatqa ortaq mereke Jańa jyl merekesi jaqyndaǵanda ásiredinshilder men ózderin ultshyl sanaityndar aǵalar Jańa jyldyń hristiandardyń merekesi ekenin «dáleldep» áleýmettik jelidegi paraqshalaryna kóldei-kóldei jazba qaldyrtyn dástúr qalyptasqan.
Odan keiin 8 naýryz halyqaralyq áielder merekesi jaqyndaǵanda taǵy da baiaǵy áleýlailaryna basatynyn bilemiz.
Jaqsy, biz Islam dini úshin Jańa jyl men 8 naýryz merekesin toilamaiyq. Al Táýelsizdigimizdi, jeke memleket ekenimizdi jastarǵa sezindirý úshin 23 aqpan kúni bir-birimizdi quttyqtamai, artymyzdy qysyp, araq ishpei 7 mamyrǵa deiin shydaýǵa bolady ǵoi. Biraq kóptegen aǵalarymyz rezvasy ketken burandadai, jylda eski ádetine basady.
Qazaq jastarynyń Áýlie Valentin merekesin toilaýyn – aqymaqtyq deýge bolatyn shyǵar. Al dardai azamattardyń 23 aqpan Keńes áskeriniń qurylǵan kúni araq iship, birin-biri quttyqtaýy – bul baryp turǵan satyqyndyq.
Qudai betin ary qylsyn, kúni erteń Ýkrainadaǵydai jaǵdai oryn alatyn bolsa, 23 aqpandy tól merekesindei toilap júrgen aǵalarymyz araǵy men tuzdalǵan qiiaryn alyp, orystardyń aldynan shyǵýy ábden múmkin.
Nurlan JUMAHAN
