Qazaqstan áielder quramasynyń kóshbasshysy Elena Rybakina mansabynda alǵash ret áielder tennisi qaýymdastyǵynyń (WTA) álemdik reitinginde birinshi orynǵa kóterildi, dep habarlaidy dalanews.kz QTF-ǵa siltep.
Bul qazaqstandyq tennisshiniń US Open-2026 týrniriniń jartylai finalyna shyǵýynyń arqasynda múmkin boldy. WTA-nyń live reitinginde Elena Rybakina Belarýs ókili Arina Sobolenkodan ozyp, jańa kóshbasshy atandy. Reitingtiń resmi jańartylǵan nusqasy dúisenbi, iaǵni 14 qyrkúiekte jariialanady.
Osylaisha, Elena Rybakina jeke synda álemdik reitingte kósh bastaǵan Qazaqstannyń tuńǵysh ókili atandy. Buǵan deiin elimizdiń birde-bir sportshysy áielder arasynda da, erler arasynda da jeke synda álemdik reitingtiń birinshi satysyna kóterilmegen.
Memleket basshysy tennisshi Elena Rybakinany álemniń birinshi raketkasy ataǵyna ie bolýymen quttyqtady.
"Siz airyqsha talant pen tynymsyz eńbektiń jáne ózińizge degen nyq senimniń arqasynda WTA reitinginde kósh bastap, biik shyńdy baǵyndyrdyńyz. Osynaý tarihi jeńisińiz qazaq sportynyń dańqyn asyrdy. Esimińiz álemdik tennis jylnamasynan oiyp turyp oryn aldy. Sizdiń jetistikke toly jolyńyz – elimizdiń jas sportshylary men dúnieniń túkpir-túkpirindegi milliondaǵan tennis jankúieri úshin úlgi-ónege. Sonymen qatar, kortta da, qoǵamdyq oryndarda da, jurtshylyqpen qarym-qatynas barysynda da baiqalatyn joǵary mádenietińizdi airyqsha atap ótkim keledi. Bul – sózsiz sizdiń parasatyńyz ben adami qalpyńyzdyń aiqyn kórinisi", – dep jazylǵan quttyqtaýda.
Qasym-Jomart Toqaev Elena Rybakinanyń chempiondarǵa tán jalyndy rýhtan qýat alyp, jańa belesterge batyl qadam basa berýine tilektestik bildirdi.
