قازاقستان ەيەلدەر قۇراماسىنىڭ كٶشباسشىسى ەلەنا رىباكينا مانسابىندا العاش رەت ەيەلدەر تەننيسٸ قاۋىمداستىعىنىڭ (WTA) ەلەمدٸك رەيتينگٸندە بٸرٸنشٸ ورىنعا كٶتەرٸلدٸ, دەپ حابارلايدى dalanews.kz قتف-عا سٸلتەپ.
بۇل قازاقستاندىق تەننيسشٸنٸڭ US Open-2026 تۋرنيرٸنٸڭ جارتىلاي فينالىنا شىعۋىنىڭ ارقاسىندا مٷمكٸن بولدى. WTA-نىڭ live رەيتينگٸندە ەلەنا رىباكينا بەلارۋس ٶكٸلٸ ارينا سوبولەنكودان وزىپ, جاڭا كٶشباسشى اتاندى. رەيتينگتٸڭ رەسمي جاڭارتىلعان نۇسقاسى دٷيسەنبٸ, ياعني 14 قىركٷيەكتە جارييالانادى.
وسىلايشا, ەلەنا رىباكينا جەكە سىندا ەلەمدٸك رەيتينگتە كٶش باستاعان قازاقستاننىڭ تۇڭعىش ٶكٸلٸ اتاندى. بۇعان دەيٸن ەلٸمٸزدٸڭ بٸردە-بٸر سپورتشىسى ەيەلدەر اراسىندا دا, ەرلەر اراسىندا دا جەكە سىندا ەلەمدٸك رەيتينگتٸڭ بٸرٸنشٸ ساتىسىنا كٶتەرٸلمەگەن.
مەملەكەت باسشىسى تەننيسشٸ ەلەنا رىباكينانى ەلەمنٸڭ بٸرٸنشٸ راكەتكاسى اتاعىنا يە بولۋىمەن قۇتتىقتادى.
"سٸز ايرىقشا تالانت پەن تىنىمسىز ەڭبەكتٸڭ جەنە ٶزٸڭٸزگە دەگەن نىق سەنٸمنٸڭ ارقاسىندا WTA رەيتينگٸندە كٶش باستاپ, بيٸك شىڭدى باعىندىردىڭىز. وسىناۋ تاريحي جەڭٸسٸڭٸز قازاق سپورتىنىڭ داڭقىن اسىردى. ەسٸمٸڭٸز ەلەمدٸك تەننيس جىلناماسىنان ويىپ تۇرىپ ورىن الدى. سٸزدٸڭ جەتٸستٸككە تولى جولىڭىز – ەلٸمٸزدٸڭ جاس سپورتشىلارى مەن دٷنيەنٸڭ تٷكپٸر-تٷكپٸرٸندەگٸ ميلليونداعان تەننيس جانكٷيەرٸ ٷشٸن ٷلگٸ-ٶنەگە. سونىمەن قاتار, كورتتا دا, قوعامدىق ورىنداردا دا, جۇرتشىلىقپەن قارىم-قاتىناس بارىسىندا دا بايقالاتىن جوعارى مەدەنيەتٸڭٸزدٸ ايرىقشا اتاپ ٶتكٸم كەلەدٸ. بۇل – سٶزسٸز سٸزدٸڭ پاراساتىڭىز بەن ادامي قالپىڭىزدىڭ ايقىن كٶرٸنٸسٸ", – دەپ جازىلعان قۇتتىقتاۋدا.
قاسىم-جومارت توقاەۆ ەلەنا رىباكينانىڭ چەمپيوندارعا تەن جالىندى رۋحتان قۋات الىپ, جاڭا بەلەستەرگە باتىل قادام باسا بەرۋٸنە تٸلەكتەستٸك بٸلدٸردٸ.
