Abai oblysyndaǵy Tarbaǵatai memlekettik ulttyq tabiǵi parkinde dala órtiniń odan ári taralýy toqtatyldy. Qazir órttiń jiegi turaqty, byqsyp jatqan oshaqtardy sóndirý jumystary jalǵasyp jatyr, dep habarlaidy dalanews.kz.
Órt 20 qyrkúiekte Aiagóz aýyldyq okrýginde tirkelip, sol kúni saǵat 18:30-da Tarbaǵatai memlekettik ulttyq tabiǵi parkiniń Qarabuirat ormanshylyǵy aýmaǵyndaǵy memlekettik orman qory jerlerine ótken.
22 qyrkúiek saǵat 04:30-da órttiń taralýy toqtatyldy. Qazirgi ýaqytta mamandar byqsyp jatqan oshaqtardy sóndirip, órt jiegin baqylaýda ustap otyr.
Saǵat 12:00-degi málimet boiynsha, órtti sóndirýge orman kúzeti, «Semei ormany» MOTR, Abai oblysynyń Tótenshe jaǵdailar departamenti jáne jergilikti atqarýshy organdardan 284 adam men 26 tehnika jumyldyrylǵan.
Órtti áýeden sóndirý úshin «Qazaviaormanqorǵaý» RMQK men Ulttyq qaýipsizdik komitetiniń sý tógý qurylǵylarymen jabdyqtalǵan eki Mi-8 tikushaǵy tartyldy. Órt sóndirý jumystary bastalǵaly beri áýeden 22 ret sý tógilip, jalpy 59 tonna sý paidalanylǵan.
Qutqarýshylardyń jumysyna taýly jer bederi men tehnika jete almaityn qiyn ýchaskeler kedergi keltirip otyr. Mamandardyń málimetinshe, órt negizinen memlekettik orman qorynyń ormansyz aýmaqtaryn qamtyǵan.
Qarabuirat aýylynda jedel shtab quryldy. Oqiǵa ornynda jumystardy úilestirýge QR ETRM Orman sharýashylyǵy jáne janýarlar dúniesi komiteti tóraǵasynyń orynbasary M. Elemesov qatysyp jatyr.
