Tarazda soqqyǵa jyǵylǵan depýtat Nurlan Baiǵaziev ózin soqqyǵa jyqqan azamat tarapynan qorqytýlar bolyp jatqanyn aitty, dep habarlaidy Dalanews.kz.
Bul týraly ol “Za nami ýje vyehali” telegram arnasyna málimdegen.
Almaty oblysy Ile aýdandyq máslihatynyń depýtaty Nurlan Baiǵazievtiń aitýynsha, janjal qarapaiym jaǵdaidan bastalǵan.
“Sol kúni Tarazda bir azamatqa quqyqtyq keńes berip otyrǵan edim. Telefonymnyń qýaty taýsylyp qalǵan soń, ony qýattaýǵa rozetka izdedim. Rozetka – bir otbasy keshki as iship otyrǵan ústeldiń qasynda eken. Basqa rozetka bolmady ma, álde jai sol jerge toqtadym ba – naqty bilmeimin. Biraq sol otbasynyń ákesi meniń ol jerde telefon qýattaýyma qarsy boldy”, – deidi ol.
Depýtattyń aitýynsha, dál sol azamat oǵan judyryq ala júgirgen.
“Meni birden uryp qulatty. Jerge qulaǵan soń, basym men deneme tepkilei bastady. Qasymdaǵy klientim ázer toqtatty. Sol klient politsiia shaqyrdy. Olar kelip, álgi azamatty oqiǵa ornynda ustaǵan. Bizdi Taraz qalasynyń politsiia basqarmasyna alyp ketti. Biraq maǵan jaǵdaiym nasharlap ketken soń, jedel járdem shaqyrtylyp, meni travmatologiia bólimine jetkizdi. Al shabýyl jasaǵan azamatty keiin bostandyqqa shyǵaryp jiberipti”, – dep málimdeidi Baiǵaziev.
Onyń sózinshe, ol aýrýhanada jatqan kezde politsiiany qaita shaqyrǵan. Alaida tártip saqshylary úsh-tórt saǵattan keiin ǵana kelgen.
“Sol kezde álgi azamat aýrýhanaǵa qaita kelip, meniń qasymdaǵylarǵa, ásirese Baýyrjanǵa (meniń klientim) “nege shý shyǵardyń?” dep úrkite bastady. Men dereý aryz jazdym. Biraq ony eshkim ustamai, qaita dostarymen birge tún ortasynda aýrýhanaǵa kelip júr”, – deidi depýtat.
