تارازدا سوققىعا جىعىلعان دەپۋتات نۇرلان بايعازييەۆ ءوزىن سوققىعا جىققان ازامات تاراپىنان قورقىتۋلار بولىپ جاتقانىن ايتتى، دەپ حابارلايدى Dalanews.kz.
بۇل تۋرالى ول “زا نامي ۋجە ۆىەحالي” تەلەگرام ارناسىنا مالىمدەگەن.
الماتى وبلىسى ىلە اۋداندىق ءماسليحاتىنىڭ دەپۋتاتى نۇرلان بايعازييەۆتىڭ ايتۋىنشا، جانجال قاراپايىم جاعدايدان باستالعان.
“سول كۇنى تارازدا ءبىر ازاماتقا قۇقىقتىق كەڭەس بەرىپ وتىرعان ەدىم. تەلەفونىمنىڭ قۋاتى تاۋسىلىپ قالعان سوڭ، ونى قۋاتتاۋعا روزەتكا ىزدەدىم. روزەتكا – ءبىر وتباسى كەشكى اس ءىشىپ وتىرعان ۇستەلدىڭ قاسىندا ەكەن. باسقا روزەتكا بولمادى ما، الدە جاي سول جەرگە توقتادىم با – ناقتى بىلمەيمىن. ءبىراق سول وتباسىنىڭ اكەسى مەنىڭ ول جەردە تەلەفون قۋاتتاۋىما قارسى بولدى”، – دەيدى ول.
دەپۋتاتتىڭ ايتۋىنشا، ءدال سول ازامات وعان جۇدىرىق الا جۇگىرگەن.
“مەنى بىردەن ۇرىپ قۇلاتتى. جەرگە قۇلاعان سوڭ، باسىم مەن دەنەمە تەپكىلەي باستادى. قاسىمداعى كليەنتىم ازەر توقتاتتى. سول كليەنت پوليسيا شاقىردى. ولار كەلىپ، الگى ازاماتتى وقيعا ورنىندا ۇستاعان. ءبىزدى تاراز قالاسىنىڭ پوليسيا باسقارماسىنا الىپ كەتتى. ءبىراق ماعان جاعدايىم ناشارلاپ كەتكەن سوڭ، جەدەل جاردەم شاقىرتىلىپ، مەنى تراۆماتولوگيا بولىمىنە جەتكىزدى. ال شابۋىل جاساعان ازاماتتى كەيىن بوستاندىققا شىعارىپ جىبەرىپتى”، – دەپ مالىمدەيدى بايعازييەۆ.
ونىڭ سوزىنشە، ول اۋرۋحانادا جاتقان كەزدە پوليسيانى قايتا شاقىرعان. الايدا ءتارتىپ ساقشىلارى ءۇش-تورت ساعاتتان كەيىن عانا كەلگەن.
“سول كەزدە الگى ازامات اۋرۋحاناعا قايتا كەلىپ، مەنىڭ قاسىمداعىلارعا، اسىرەسە باۋىرجانعا (مەنىڭ كليەنتىم) “نەگە شۋ شىعاردىڭ؟” دەپ ۇركىتە باستادى. مەن دەرەۋ ارىز جازدىم. ءبىراق ونى ەشكىم ۇستاماي، قايتا دوستارىمەن بىرگە ءتۇن ورتاسىندا اۋرۋحاناعا كەلىپ ءجۇر”، – دەيدى دەپۋتات.
