Tarazda qyzǵanyshtan áielin tunshyqtyryp óltirgen er adam 13 jylǵa sottaldy, dep habarlaidy dalanews.kz.
Ótken jyly Taraz qalasyndaǵy páterlerdiń birinde qyzǵanysh saldarynan qaiǵyly oqiǵa boldy. Áieldiń kóńildesi ony tunshyqtyryp óltirip, keiin uialy telefonyn alyp ketken.
Is materialdaryna sáikes, oqiǵa kúni er adam súiiktisi jáne onyń tanysymen birge spirttik ishimdik ishken. Qonaq ketkennen keiin er men áiel páterde ońasha qalǵan.
Ekeýi jaqyn qarym-qatynasta bolǵan sátte áieldiń telefonyna belgisiz adam qońyraý shalǵan. Áiel qońyraý shalǵan adamnyń kúieýi ekenin aitqan. Muny estigen kóńildesi qyzǵanyshqa boi aldyryp, ashýǵa minip, áieldi moinynan qylqyndyra bastaǵan. Saldarynan áiel oqiǵa ornynda kóz jumǵan.
Oqiǵadan keiin er adam marqumnyń quny 15 myń teńge turatyn uialy telefonyn alyp, páterden ketip qalǵan. Ol keshke deiin qala kóshelerinde sendelip júrgen. Keiin saiabaqtardyń birinde politsiia qyzmetkerlerine ózi baryp, adam óltirgen bolýy múmkin ekenin aitqan. Kórsetilgen mekenjaiǵa barǵan politseiler páterden áieldiń máiitin tapqan.
Keiin sot er adamdy adam óltirý jáne urlyq jasaý baptary boiynsha kináli dep tanydy. Qylmystyq quqyq buzýshylyqtardyń jiyntyǵy boiynsha oǵan qaýipsizdigi barynsha joǵary qylmystyq-atqarý júiesi mekemesinde óteýmen 13 jyl bas bostandyǵynan aiyrý jazasy taǵaiyndaldy.
Sot onyń áreketinen qaýipti retsidiv belgilerin de tanydy. Osyǵan bailanysty sottalýshyǵa psihoaktivti zattardy qoldanýǵa bailanysty týyndaǵan buzylystar boiynsha májbúrli em qabyldaý mindetteldi.
