Tarazda Almaty oblysy Ile aýdandyq máslihatynyń depýtaty Nurlan Baiǵazievke dámhanadaǵy oqiǵa kezinde qol kóterdi degen kúdikke ilingen azamattyń jary beineúndeý jariialap, janjaldyń neden bastalǵanyn aityp berdi, dep habarlaidy Dalanews.kz.
Áieldiń aitýynsha, janjalǵa depýtattyń ózi sebepker bolǵan.
"2025 jyldyń 13 mamyry, shamamen keshki 18:00-de kúieýim, 10 jasar qyzymyz jáne 22 kúndik sábimen birge “Ǵibrat” meiramhanasyna bardyq. Biz otyrǵan ústeldiń janyna Nurlan Baiǵaziev kelip, sábiim jatqan orynǵa jaqyn tustaǵy rozetkaǵa telefonyn qýattaýǵa qoidy. Men sabyrmen: «Aǵa, basqa jaqqa qoisańyz bolmai ma? Qulap ketse, balamnyń ústine túsýi múmkin. Onyń ústine, sábi úshin ziian» dedim. Ol kisi sál úndemei turyp: «Qaida qoiatynymdy ózim bilemin. Bul – qoǵamdyq oryn, toq ta bárimizge ortaq. Telefon qulamaidy, ózim jaýap beremin», – dep jaýap berdi", – dedi kelinshek.
Osy kezde onyń kúieýi de aralasyp, depýtattan ótinish jasaǵan.
"Kúieýim de: "Aǵa, ótinish aityp tur ǵoi, basqa jaqqa qoisańyz" dep eskertti. Biraq Baiǵaziev: "Sen kimsiń? Aralaspa. Meniń kim ekenimdi bilesiń be?" dep, dóreki sóilep, balaǵat sózder aita bastady. Osylaisha daý kúsheie tústi", – deidi ol.
Oqiǵanyń shielenisýine Baiǵazievtiń qasyndaǵy er adam da áser etken.
"Depýtattyń janynda bolǵan Baýyrjan Abdraiymov degen azamat janjalǵa aralasyp, «Kimmen sóilesip turǵanyńdy bilesiń be? Ol – depýtat, advokat» dep, kerisinshe otqa mai quidy. Sol sátte Baiǵaziev telefonynyń kamerasyn qosyp, arandatý áreketterin jalǵastyrdy. Kamera qosylǵan soń balaǵattaýdy toqtatyp, qasaqana áreketke kóshti", – dedi beineúndeýde áiel.
Onyń sózinshe, dámhana ákimshiligi de aralasyp, depýtattan telefonyn alyp qýattap berýdi usynǵan. Alaida ol qarsylyq bildirip, “osynda qýattaimyn” dep turyp alǵan.
"Sodan keiin Baiǵaziev kúieýime: «Men senimen sóilessem, uiyqtatyp tastaimyn. Mamalatamyn, tizerletemin» dep arandatýdy jalǵastyrdy. Men daý ulǵaiyp bara jatqan soń: «Areke, qoia salyńyzshy» desem, ol maǵan «Qatyn, aýzyńdy jap!» dep dóreki til qatty. Kúieýim meni qorǵap, ashýǵa minip, Baiǵazievke sol qolymen bir soqqy jasady", – deidi áiel.
Aita keteiik, 2025 jyldyń 13 mamyry kúni saǵat 18:00 shamasynda Taraz qalasynda Almaty oblysy Ile aýdandyq máslihatynyń depýtaty, zańger Nurlan Baiǵazievtyń aýyr soqqyǵa jyǵylǵany týraly jazǵan edik.
Taraznews.kz málimetinshe, oqiǵa Tarazdaǵy “Ǵibrat” atty dámhanada oryn alǵan. Depýtat sol jerde klientterimen kezdesý ótkizip jatqanda, belgisiz bireý oǵan tutqiyldan shabýyl jasap, temir zatqa uqsas quralmen birneshe ret urǵan. Aldyn ala málimet boiynsha, Nurlan Baiǵaziev bas súiegine zaqym alyp, miy shaiqalǵan. Qazirgi ýaqytta ol aýrýhanada jatyr, dárigerler ony shuǵyl otaǵa daiyndaýda.
Eske salaiyq, bul shabýyl Baiǵazievtiń atyshýly oqiǵadan keiingi eki apta ishinde oryn alyp otyr. 28 sáýirde ol kámeletke tolmaǵan 17 jastaǵy qyzdy toqtatyp, qyzmettik kóligine otyrǵyzbaq bolǵan iývenaldy politsiia qyzmetkerleriniń áreketin videoǵa túsirip alǵan. Baiǵaziev olardyń zańǵa qaishy áreketin áshkerelegen. Beinejazba áleýmettik jelilerde keńinen tarap, qoǵamda úlken rezonans týdyrdy. Artynsha qyzmettik tekseris nátijesinde álgi politseiler qyzmetinen bosatylǵan edi.
