تارازدا الماتى وبلىسى ىلە اۋداندىق ءماسليحاتىنىڭ دەپۋتاتى نۇرلان بايعازييەۆكە ءدامحاناداعى وقيعا كەزىندە قول كوتەردى دەگەن كۇدىككە ىلىنگەن ازاماتتىڭ جارى بەينەۇندەۋ جاريالاپ، جانجالدىڭ نەدەن باستالعانىن ايتىپ بەردى، دەپ حابارلايدى Dalanews.kz.

ايەلدىڭ ايتۋىنشا، جانجالعا دەپۋتاتتىڭ ءوزى سەبەپكەر بولعان.

"2025 جىلدىڭ 13 مامىرى، شامامەن كەشكى 18:00-دە كۇيەۋىم، 10 جاسار قىزىمىز جانە 22 كۇندىك سابيمەن بىرگە “عيبرات” مەيرامحاناسىنا باردىق. ءبىز وتىرعان ۇستەلدىڭ جانىنا نۇرلان بايعازييەۆ كەلىپ، ءسابيىم جاتقان ورىنعا جاقىن تۇستاعى روزەتكاعا تەلەفونىن قۋاتتاۋعا قويدى. مەن سابىرمەن: «اعا، باسقا جاققا قويساڭىز بولماي ما؟ قۇلاپ كەتسە، بالامنىڭ ۇستىنە ءتۇسۋى مۇمكىن. ونىڭ ۇستىنە، ءسابي ءۇشىن زيان» دەدىم. ول كىسى ءسال ۇندەمەي تۇرىپ: «قايدا قوياتىنىمدى ءوزىم بىلەمىن. بۇل – قوعامدىق ورىن، توق تا بارىمىزگە ورتاق. تەلەفون قۇلامايدى، ءوزىم جاۋاپ بەرەمىن»، – دەپ جاۋاپ بەردى"، – دەدى كەلىنشەك.

وسى كەزدە ونىڭ كۇيەۋى دە ارالاسىپ، دەپۋتاتتان ءوتىنىش جاساعان.

"كۇيەۋىم دە: "اعا، ءوتىنىش ايتىپ تۇر عوي، باسقا جاققا قويساڭىز" دەپ ەسكەرتتى. ءبىراق بايعازييەۆ: "سەن كىمسىڭ؟ ارالاسپا. مەنىڭ كىم ەكەنىمدى بىلەسىڭ بە؟" دەپ، دورەكى سويلەپ، بالاعات سوزدەر ايتا باستادى. وسىلايشا داۋ كۇشەيە ءتۇستى"، – دەيدى ول.

وقيعانىڭ شيەلەنىسۋىنە بايعازييەۆتىڭ قاسىنداعى ەر ادام دا اسەر ەتكەن.

"دەپۋتاتتىڭ جانىندا بولعان باۋىرجان ابدرايىموۆ دەگەن ازامات جانجالعا ارالاسىپ، «كىممەن سويلەسىپ تۇرعانىڭدى بىلەسىڭ بە؟ ول – دەپۋتات، ادۆوكات» دەپ، كەرىسىنشە وتقا ماي قۇيدى. سول ساتتە بايعازييەۆ تەلەفونىنىڭ كامەراسىن قوسىپ، ارانداتۋ ارەكەتتەرىن جالعاستىردى. كامەرا قوسىلعان سوڭ بالاعاتتاۋدى توقتاتىپ، قاساقانا ارەكەتكە كوشتى"، – دەدى بەينەۇندەۋدە ايەل.

ونىڭ سوزىنشە، ءدامحانا اكىمشىلىگى دە ارالاسىپ، دەپۋتاتتان تەلەفونىن الىپ قۋاتتاپ بەرۋدى ۇسىنعان. الايدا ول قارسىلىق ءبىلدىرىپ، “وسىندا قۋاتتايمىن” دەپ تۇرىپ العان.

"سودان كەيىن بايعازييەۆ كۇيەۋىمە: «مەن سەنىمەن سويلەسسەم، ۇيىقتاتىپ تاستايمىن. مامالاتامىن، تىزەرلەتەمىن» دەپ ارانداتۋدى جالعاستىردى. مەن داۋ ۇلعايىپ بارا جاتقان سوڭ: «ارەكە، قويا سالىڭىزشى» دەسەم، ول ماعان «قاتىن، اۋزىڭدى جاپ!» دەپ دورەكى ءتىل قاتتى. كۇيەۋىم مەنى قورعاپ، اشۋعا ءمىنىپ، بايعازييەۆكە سول قولىمەن ءبىر سوققى جاسادى"، – دەيدى ايەل.

ايتا كەتەيىك، 2025 جىلدىڭ 13 مامىرى كۇنى ساعات 18:00 شاماسىندا تاراز قالاسىندا الماتى وبلىسى ىلە اۋداندىق ءماسليحاتىنىڭ دەپۋتاتى، زاڭگەر نۇرلان بايعازييەۆتىڭ اۋىر سوققىعا جىعىلعانى تۋرالى جازعان ەدىك.

Taraznews.kz مالىمەتىنشە، وقيعا تارازداعى “عيبرات” اتتى ءدامحانادا ورىن العان. دەپۋتات سول جەردە كليەنتتەرىمەن كەزدەسۋ وتكىزىپ جاتقاندا، بەلگىسىز بىرەۋ وعان تۇتقيىلدان شابۋىل جاساپ، تەمىر زاتقا ۇقساس قۇرالمەن بىرنەشە رەت ۇرعان. الدىن الا مالىمەت بويىنشا، نۇرلان بايعازييەۆ باس سۇيەگىنە زاقىم الىپ، ميى شايقالعان. قازىرگى ۋاقىتتا ول اۋرۋحانادا جاتىر، دارىگەرلەر ونى شۇعىل وتاعا دايىنداۋدا.

ەسكە سالايىق، بۇل شابۋىل بايعازييەۆتىڭ اتىشۋلى وقيعادان كەيىنگى ەكى اپتا ىشىندە ورىن الىپ وتىر. 28 ساۋىردە ول كامەلەتكە تولماعان 17 جاستاعى قىزدى توقتاتىپ، قىزمەتتىك كولىگىنە وتىرعىزباق بولعان يۋۆەنالدى پوليسيا قىزمەتكەرلەرىنىڭ ارەكەتىن ۆيدەوعا ءتۇسىرىپ العان. بايعازييەۆ ولاردىڭ زاڭعا قايشى ارەكەتىن اشكەرەلەگەن. بەينەجازبا الەۋمەتتىك جەلىلەردە كەڭىنەن تاراپ، قوعامدا ۇلكەن رەزونانس تۋدىردى. ارتىنشا قىزمەتتىك تەكسەرىس ناتيجەسىندە الگى پوليسەيلەر قىزمەتىنەن بوساتىلعان ەدى.